Fir vill europäesch Länner sinn d'Reeswarnunge vun e Méindeg un nees opgehuewen, mat e puer Exceptiounen.

Norwegen a Finnland hunn hir Arees-Spär nach bis iwwert de 15. Juni eraus verlängert. Och fir a Schweden ze reesen, bleift den Ament mol nach eng Reeswarnung bestoen, well si déi maximal Grenz vu 50 Neiinfektioune pro 100.000 Awunner an enger Woch iwwerschratt hunn.

Polen ass mam gudde Beispill virgaangen an hat schonn e Samschdeg den Owend seng Grenzen opgemaach. Fir a Frankräich oder Dänemark ze kommen, muss een allerdéngs mat Kontrollen un der Grenz rechnen. Vun e Méindeg un dierf een awer och nees an d'Net-EU-Staaten am Schengenraum, Island, Schwäiz a Liechtenstein reesen.

Spuenien huet e Sonndeg annoncéiert den 21. Juni seng Grenze bannent der EU nees opzemaachen. D'Grenzkontrolle géifen all ewechfalen, ausser déi fir a Portugal. Déi bleiwe bis den 1. Juli bestoen, sou de Regierungschef Pedro Sánchez.

Eng Exceptioun ass Mallorca, ronn 11.000 Touristen aus Däitschland gi sech e Méindeg an engem éischten Testlaf op der Balearen-Insel erwaart.Vum 15. Juni u kann een nees bannent der EU reesen

Wéi eng Reegele gëllen no der Ouverture a Frankräich an an der Belsch?

Am Communiqué vun der franséischer Regierung steet dran, dass d'Leit nees ouni Restriktiounen dierfen areesen, esou wéi dat virum 18. Mäerz de Fall war. Restauranten a Caféen zu Paräis kënne vun e Méindeg un nees ganz opmaachen. Bis ewell konnt just baussen op den Terrasse giess a gedronk ginn.

An den Altersheemer gi Visitten nees erlaabt. Den 2. Tour vun de Gemengewale gëtt wéi geplangt Enn Juni ofgehalen.

"Vu muer u kënne mir d'Kapitel vun der 1. Phas vun der Kris ofschléissen", sou den Emmanuel Macron an enger Ried e Sonndeg den Owend op der Tëlee.

Frankräich war mat iwwer 29.000 Doudesaffer besonnesch staark betraff vun der Pandemie.

D’Informatioun ass ausgeschëldert, wou d'Droe vun enger Mask obligéiert gëtt, wéi zum Beispill am Transport publique. Am ëffentleche Raum ass d'Droe vun engem Mondschutz net obligatoresch, gëtt awer recommandéiert. Wat Gruppéierungen ugeet, dierfen net méi wei 10 Leit an der Ëffentlechkeet beienee sinn. Bannent enger Privatwunneng ginn et keng Limitatiounen.

Och eis belsch Noperen hiewen d’Grenzkontrollen ëm Mëtternuecht op. D’Grenzen dierf also nees fir Familljevisitten an Akeef passéiert ginn. Och Grenzgänger musse keng Pabeieren a Certificate méi presentéieren. Weider Labberunge fir de Reesverkéier sollen an deenen nächsten Deeg annoncéiert ginn.

Weiderhi gëllen awer a béide Länner déi gängeg Hygiènesmesuren. Leit solle sanitär Reegelen anhalen, de Social Distancing respektéieren, sech dacks d’Hänn wäschen, respektiv desinfizéieren an an den Ielebou houschten oder néitschen.

Wéi eng Reegele gëllen no der Ouverture?
Am Communiqué vun der franséischer Regierung steet dran, dass d'Leit nees ouni Restriktiounen dierfen areesen, esou wéi dat virum 18 Mäerz de Fall war.