De neiaartege Corona-Virus, deen zu schwéieren Otemwee-Erkrankungen féiert, huet a China bis ewell zu 9 Doudesfäll gefouert.

Weltwäit huet de Virus scho 17 Mënschen d'Liewe kascht, eleng e Mëttwoch goufen et 11 Doudesfäll.

Bal 500 Leit hätte sech mëttlerweil mam Virus infizéiert, heescht et vun de chineeseschen Autoritéiten.

D'Weltgesondheetsorganisatioun WHO ass e Mëttwoch zu Genf fir eng Krisesëtzung beienee komm. Majo hei gouf awer decidéiert, den internationalen Noutstand net auszeruffen.

En éischte Fall ausserhalb vu China  gouf och en Dënschdeg festgestallt, nämlech bei engem Mann an den USA, dee kuerz virdrun aus China koum. Bei senger Réckrees hätt hie keng Symptomer gehat, wier awer fir eng Kontroll an d'Spidol gaangen.

De Mann wier an engem gudde gesondheetlechen Zoustand an et géif just ee klenge Risk bestoen, aner Leit ugestach ze hunn.

D’EU-Kommissioun huet iwwerdeems scho wëssen gedoen, dass een op e méiglecht Ausbreede vum Virus an Europa preparéiert wier a séier Géigemesuren kéint an d’Weeër leeden.

Wéi e Mëttwoch den Owend eiser Zäit dann och bekannt ginn ass, dierfen dann och vu Wuhang aus keng Fligeren oder Zich méi starten. Dës Decisioun hunn déi chinesesch Autoritéite getraff. Dem staatleche Fernseesender CCTV no, dierft d’Populatioun vu Wuhan, wou de Virus ausgebrach ass, nëmme méi mat enger spezieller Autorisatioun d’Stad verloossen. Et hofft een, datt op dës Manéier, eng gréisser Epidemie vum Virus verhënnert ka ginn.