D'Annonce vun enger Deelmobiliséierung weist op eng weider Eskalatioun am Krich an der Ukrain hin.

Nodeems den tierkesche President Erdogan en Dënschdeg an engem Interview gesot hat, de President Putin wéilt de Krich an der Ukrain esou séier wéi méiglech op een Enn bréngen, huet de russesche Verdeedegungsminister e Mëttwoch an enger Usprooch annoncéiert, datt d'Truppen opgestockt gi sollen. D'Waffeproduktioun soll och verstäerkt ginn.

Dräi Deeg sollt déi vu Russland sougenannte “speziell Militäroperatioun” an der Ukrain daueren am Februar. 210 Deeg ass elo déi russesch Invasioun vum Land schonn am Gaangen. An der vum Putin ugeuerdenter Deelmobiliséierung sollen 300.000 Reservisten an d'Ukrain geschéckt ginn, déi schonn Erfarung am Militär gesammelt hunn. De Verdeedegungsminister Sergej Schoigu sot, am Ganze géifen et a Russland eng 25 Millioune Reserviste ginn.

Souguer China huet elo zu enger Wafferou opgeruff. Et leeft deemno net alles no Plang fir de Kreml. Wat awer E Mëttwoch ugekënnegt gouf, ass e geféierlechen Direktiounswiessel.

Et géif drëms goen, russesch Territoiren ze verdeedegen, esou de Putin. Zil vu Russland wier et, d'Regioun Donbass am Oste vun der Ukrain ze "befreien".

A senger Usprooch huet de Putin dem Westen e Mëttwoch virgeheit, Russland "zerstéieren" ze wëllen. Russland géif all "disponibel Mëttel" asetzen, fir säin Territoire ze verdeedegen. Indirekt gouf deemno och nees mat Nuklearwaffe gedreet.

Rezent op engem regionale Sommet an Usbekistan mat de wéinegen enke Partner a Vertrauten, déi him nach bleiwen, krut de Wladimir Putin virun e puer Deeg kloer vermëttelt, dass de Krich géint d'Ukrain keng gutt Iddi wier an dësen Zäiten. Mol net 12 Stonnen nodeems och den tierkesche President Erdogan gemengt huet ze wëssen, de Kreml wéilt séier aus dem Konflikt erausklammen, koum d'Uso vu Moskau, wëllen an d'Verlängerung ze goen.

De Wladimir Putin: "Mir schwätze just vun enger deelweiser Mobiliséierung. Nëmme Leit aus der militärescher Reserve ginn agezunn – mat Prioritéit déi, déi Déngscht geleescht hunn an eng Spezialiséierung hunn."

Et ass déi éischt Mobiliséierung iwwerhaapt a Russland zanter där vun der Sowjetunioun am Zweete Weltkrich an et deit kloer drop hin, dass d’Invasioun aus Siicht vu Moskau am Gaang ass schif ze lafen. Zemools wann ee muss fir d'Xte Kéier Nuklearwaffen an d’Gespréich bréngen: "Wann déi territorial Integritéit vun eisem Land a Gefor ass, dann notze mer all d’Méiglechkeeten, déi mer hunn, fir Russland an eist Vollek ze schützen. Ech bluffen net."

Nodeems d'Ukrain an de leschte Wochen ëmmer nees Terrain zeréckgewonnen huet, hu prorussesch Separatisten an de besate Gebitter an der Ost- a Südukrain "Referenden" annoncéiert, an deenen d'Leit iwwer eng Annexioun u Russland ofstëmme sollen. "D'Decisioun, déi d'Majoritéit vun de Bierger an de Volleksrepublicke Luhansk an Donezk, an de Gebidder Cherson a Saporischschja treffen, ënnerstëtze mir", esou de Putin a senger Usprooch.

D'Referenden, déi scho fir d'nächst Woch ugesat sinn, déi ouni Accord vun der Ukrain an ouni onofhängeg international Iwwerwaachung duerchgefouert ginn, lafen op eng séier Annexioun duerch Russland eraus. Sollt et dozou kommen, géing Russland déi ukrainesch Territoirë wuel och als "säin Territoire" ugesinn a se entspriechend verdeedege wëllen.

Russland kontrolléiert mëttlerweil 4 Oblasten, d.h. Verwaltungsbezierker an der Ukrain, awer just zum Deel. Eng Krichsregioun, an där soll gewielt ginn an aus där vill Awunner geflücht sinn, huet vëlkerrechtlech Null Legitimitéit. Déi ethnesch russesch Populatioun, déi sech mat Liewensmëttelhëllef kafe gelooss huet, soll dann tëscht e Freideg an en Dënschdeg ofstëmmen, Deel ze gi vun der russescher Federatioun.

Eng ukrainesch militäresch Befreiung vun den ukrainesche Stied Luhansk oder Cherson wier domat eng Attack op Russland. De Wladimir Putin stéing op eemol net méi an engem destruktiven Invasiouns-, mee an engem kënschtlech erbäigefouerten Defensiv-Krich.

Als selwer-deklaréierte Landesretter géif hien dann och nei politesch Legitiméierung a Russland sichen a wa méiglech fannen.

E bësse Bluff war e Mëttwoch dann awer dobäi… De russesche Verdeedegungsminister Sergei Schoigu beklot bal 6.000 russesch Zaldoten, déi bis ewell an der Ukrain gefall wieren. Dem britteschen an dem ukrainesche Geheimdéngscht no wieren et der awer op d’mannst 10 Mol esouvill. Fir der 6.000 z’ersetzen, bräicht een der och kaum 300.000 amplaz.

Eng ganz Rei Länner hunn an de leschte Stonnen op der UNO-Vollversammlung awer schonn annoncéiert, dës "Scheinreferenden" net unzëerkennen. D'Ukrain wäert de Schratt vu Russland als Ausdrock vun Angscht, datt d'Ukrain am Krich lues a lues d'Iwwerhand ze kréie schéngt.

De Weste kritiséiert d'Deelmobiliséierung vu Russland ganz schaarf. London schwätzt vun enger "Eskalatioun, déi engem Suerge mécht." Kiew seet, de Schratt wär z’erwaarde gewiescht, well de Krich fir Russland net wéi geplangt verlaf ass.

Russland sot och, et hätt ee knapps 6.000 Zaldote bis ewell am Krich verluer. Bei der Ukrain wären et 10 Mol sou vill. Onofhängeg iwwerpréiwe léisst sech dat net. D'Ukrain selwer hat Enn August vu knapp 9.000 Zaldote geschwat, déi am Krich ëmkomm sinn.