Och wann den ukrainesche President ëmmer nees fuerdert, datt säi Land misst séier an d'NATO opgeholl ginn, gesäit de Lëtzebuerger Premier dëst anescht.

Um Dësch vun de Staats- a Regierungscheffen zu Vilnius läit och d'Demande vun der Ukrain, fir der NATO bäizetrieden.

Lëtzebuerg vertrëtt an dësem Dossier awer weider en determinéierten "Nee", dat widderhëlt de Premier Xavier Bettel um RTL-Mikro a Litauen. Aus dem Grand-Duché kënnt keng gréng Luucht, esoulaang Krich an der Ukrain ass. De Lëtzebuerger Premier erkläert dëst mam Artikel 5 vun der NATO. Well sollt d'Ukrain als Land, wat am Krich ass, Member vun der NATO ginn, wieren duerch dësen Artikel och all déi aner NATO-Memberstaaten am Krich mam Feind vun der Ukrain.

De Xavier Bettel präziséiert awer och, datt een der Ukrain wëll hëllefen, datt nees Fridden am Land herrscht. A wann dat bis erreecht ass, kann et séier mat enger NATO-Memberschaft goen. Ganz änlech gesäit de Premier iwwregens och eng méiglech EU-Memberschaft. Fir de Xavier Bettel muss sech a béide Prozeduren einfach un d'Reegele gehale ginn.

Extrait Xavier Bettel

2 Prozent fir d'Defense - "Rabatt" fir Lëtzebuerg accordéiert

E Minimum vun 2 Prozent vum PIB sollen d‘NATO-Memberstaaten an hir Defense investéieren. Dat war d‘Fuerderung virum Sommet zu Vilnius vum Generalsekretär Jens Stoltenberg. Fir Lëtzebuerg hätt dat konkret bedeit, dass 1 Milliard méi misst fir d‘Verdeedegung mobiliséiert ginn. Scho virum Sommet hat de Grand-Duché dofir wëssen gedoen, dass ee wéilt, dass mam RNB, dem Revenu national brut, géing gerechent ginn an net mam PIB. Dëse sougenannte "Rabatt" fir Lëtzebuerg wier elo offiziell accordéiert ginn, präziséiert de Verdeedegungsminister François Bausch.

"Mir kruten elo zougesot, dass dat sou gemaach gëtt. Dat heescht, am Text selwer wäert natierlech de PIB drastoen, mee et wäert kloer sinn, dass fir Lëtzebuerg den RNB gëllt. Dat bedeit, dass wann ech elo kucken, dass mir bis 2028 een Prozent vum PIB ustriewen, dass wann ech dat ëmrechnen, da wären mer op 1,5 Prozent vum RNB. Dat ass schonn een enormen Ënnerscheed par Rapport zum PIB. An dat ass natierlech, well mer zu Lëtzebuerg 500.000 Aarbechtsplazen hunn an d‘Hallschent si besat vu Frontalieren. Dat heescht, et si keng Lëtzebuerger Residenten an déi ginn hei erausgerechent. An dofir ass dat och e manner groussen Effort ze maachen."

Et hätt een am Géigenzuch awer och missen verspriechen, fir no 2028 weider bis op 2 Prozent erop z‘investéieren. Mä dat war natierlech manner beim RNB wéi beim PIB, erkläert de François Bausch. Et géingen eng Rei Iddie ginn fir z‘investéieren zum Beispill am Beräich vum Space zesumme mat der SES. Awer och zum Beispill d‘Awacs-Fligeren missten ersat ginn. Mä dat wier nach net fir haut a Muer, sou de gréngen Verdeedegungsminister.

Wat d'Pilote-Formatioun ugeet, dat wier eng Initiativ vun Holland a vun Dänemark, do bedeelegt sech Lëtzebuerg finanziell. Ugangs just un der Formatioun, méi spéit villäicht och un der Maintenance. Et wier de Beweis, datt Lëtzebuerg säi Bäitrag fir d'NATO géif leeschten.