Den Donald Trump hat e Freideg senge Sympathisanten zu Warren Rendez-vous ginn. Do, wou hie viru 4 Joer trotz Nidderlag am Michigan mat 60 % gewielt gouf.

Et sinn nach 3 Deeg bis d’Presidentschaftswalen an den USA an de Sondagen no leien déi zwee Kandidaten Harris an Trump an den US-Staate Wisconsin a Michigan manner wéi ee Prozentpunkt auseneen. Viru 4 Joer hat den Donald Trump am Michigan verluer, wuel ganz neelech, awer duerfir däitlech an der Wirtschaftsmetropol Detroit, wou den Joe Biden e staarkt Resultat konnt verbuchen. Eenzeg Ausnam war Macomb County, e Viruert vun Detroit, dee mat iwwer 60% deemools un den Trump goung. E Freideg den Owend war de Petz Bartz fir ons op der Plaz.

Den Trump hat senge Sympathisante Rendez-vous ginn, do, wou hie viru 4 Joer iwwerzeegend gewielt gouf. Zu Warren am Macomb County, just nërdlech baussent Detroit a Michigan. Virun der Hal gouf sech net grad gedréckt, mee den 1. November ass och en normale Schaffdag an den USA. Bannena wier de Sall voll gewiescht, gouf ons verséchert. Mir wëssen et net. Well wéi alleguer déi aner Kolleegen aus dem Ausland goufe mir trotz Umeldung net eragelooss. Den E -Mail mat der Demande koum zréck "denied", refuséiert. Et ass egal, et ass souwisou net déi auslännesch Press, déi géif eppes dozou bäidroen, Amerika erëm grouss ze maachen. Mee et seet awer vill driwwer aus, wéi en Trump dierft plangen, déi nächst véier Joer d'Land ze féieren. "The Land of the free" - D'Land vun der Fräiheet, sou wéi d'Republikaner et definéiert haten. D'Pressefräiheet ass awer schonn op der Streck bliwwen.

Am US-Staat Michigan ass déi amerikanesch Autosindustrie doheem. Et geet an der Ried um Ecran zum Beispill drëms, de Verbrenner ze retten, iwwerdeems baussen um Parking e Fan mat engem Cybertruck ronderëm fiert. Et si Widderspréch, déi hei zesummefannen an déi och dës Natioun ausmaachen. Alles, wat hei geduecht gëtt, bleift dës Säit vum Bord vum Teller.

Hei eng Partie Aussoe vu Sympathisante sur place:

"Dat wichtegst ass d’Sécherheet op der Grenz. Mir si keng souverän Natioun méi. Mir hu lauter Illegaler, déi an onst Land kommen an ons Kanner ëmbréngen. Eleng an de leschten zwee Joer ënnert der Kamala Harris, déi sech ëm de Grenzschutz soll bekëmmert hunn, sinn 150.000 Amerikaner duerch Opioiden ëm d’Liewe komm."

"Ech erwaarde mer geséchert Grenzen. Ech erwaarde mer méi bëllege Bensinn. Ech erwaarde mer lauter Guddes, sou wéi et virdru war. Mir liewen an Zäiten, déi mer Angscht maachen, an dat Béist muss fort."

"Ech erwaarde mer, dass méi Aarbechtsplazen an Amerika bleiwen an net fortginn. D’Grenze mussen zougemaach ginn. D’Inflatioun muss erofgoen an d’USA mussen erëm op eng besser Plaz kommen, do wou se ware just virun der Biden-Kamala Verwaltung."