Virun der Entrevue tëscht dem Trump an dem Putin fuerderen déi europäesch Ënnerstëtzer vun der Ukrain méi Drock op Russland an en Abezéie vu Kiew.

"Aktiv Diplomatie, Ënnerstëtzung fir d'Ukrain an Drock op déi Russesch Federatioun fir en Enn vum illegale Krich" misste kombinéiert ginn, heescht et e Sonndeg an enger gemeinsamer Erklärung vun europäesche Staats- a Regierungscheffen.

"Mir begréissen d'Beméiunge vum President Trump, d'Ëmbréngen an der Ukrain ze stoppen", erklären d'Staats- a Regierungscheffen aus Däitschland, Frankräich, Italien, Polen, Groussbritannien, Finnland an d'EU-Kommissiounspresidentin Ursula von der Leyen. Gläichzäiteg erklären d'Länner sech bereet, "dës Beméiungen diplomatesch z'ënnerstëtzen an eis ëmfangräich militäresch a finanziell Hëllef fir d'Ukrain weiderzeféieren". Dat kéint ënnert anerem "duerch d'Oprechterhalen an d'Verhänke vu restriktive Mesurë géint Russland", geschéien.

"Sënnvoll Verhandlunge kënnen et nëmmen am Kader vun enger Wafferou oder enger Limitatioun vun de Kämpf" ginn, betounen déi europäesch Ënnerstëtzer vu Kiew weider. Néideg wieren ausserdeem robust a glafwierdeg Sécherheetsgarantien, déi et der Ukrain erméiglechen, hir Souveränitéit wierksam ze verdeedegen.

"Mir hale weiderhin um Grondsaz fest, datt international Grenzen net mat Gewalt verännert dierfe ginn", sou nach d'Staats- a Regierungscheffen. De Wee zum Fridden an der Ukrain dierft net ouni Kiew decidéiert ginn. Den däitsche Bundeskanzler Merz huet konkreet gefuerdert, datt den ukrainesche President um geplangte Sommet e Freideg "bedeelegt gëtt".

Den ukrainesche President Selenskyj begréisst d'Ënnerstëtzung vun den Europäer. Hien hat scho virdrun op e Matsproocherecht vu sengem Land gepocht. "All Decisioun géint eis, all Decisioun ouni d'Ukrain ass och eng Decisioun géint de Fridden", huet hien e Samschdeg erkläert. Donieft refuséiert hie kategoresch, Gebidder u Moskau ofzeginn. D'Ukrainer géingen hiert Land "net de Besatzer" iwwerloossen.