E landeswäite Streik läämt en Dënschdeg de Fluchverkéier an der Belsch – och Stroossebunnen a Busser si betraff.

Um Fluchhafen an der Haaptstad Bréissel sinn all Departe betraff, wärend den zweetgréisste Fluchhafe vum Land, Charleroi, de Bedreiwer no all Departen a Landunge gestrach huet. Fir de spéiden Nomëtteg ass zu Bréissel eng grouss Demo géint dem Rietsnationalist Bart De Wewer seng Regierung geplangt.

Wéi et vun de Fluchhafebedreiwer heescht, géifen déi betraffe Passagéier vun den Airlines iwwer Ëmbuchungen a Remboursementer informéiert ginn. Grouss Deeler vum Personal an de Sécherheetskontrollen an am Gepäck-Service streiken en Dënschdeg, ma och eng ganz Rei Trammen a Busse fueren en Dënschdeg a belsche Stied net.

Belsch Gewerkschaften haten zu engem landeswäite Streik an der Demo zu Bréissel opgeruff. Ursaach sinn d'Pläng vun der aktueller Regierung, d'Pensioune vu Bunnen-Aarbechter, Polizisten an dem Léierpersonal ze kierzen. Doriwwer eraus soll Nuetsaarbecht wéineger gutt bezuelt ginn, wärend gläichzäiteg d'Aarbechtszäite flexibiliséiert ginn.

D'Gewerkschafte rechnen dermat, datt e puer zéngdausend Leit sech un der Aktioun bedeelege wäerten. D'Regierung huet d'Presentatioun vum Budget fir dat nächst Joer, an deem et eng ganz Rei Spuermesure wäerte ginn, schonn op déi nächst Woch verréckelt.