Alkohol-Exzesser op Partyen féieren dozou, dass permanent Leit mat Alkoholvergëftungen an d’Urgencen hei am Land ageliwwert ginn.

Urgentisten a Suchttherapeuten schloen Alarm. Dat well ëmmer méi Jonker mat Alkoholvergëftungen an d’Urgencen ageliwwert ginn. Obwuel zu Lëtzebuerg dem Gesetz no keen Alkohol u Jugendlecher ënner 16 Joer dierf verkaf ginn, sinn och ëmmer nees Jugendlecher ënner 16 vum sougenannte Komasaufen betraff. Fir den Dr. Jean-Marc Cloos, Psychiater a Suchttherapeut, ass haaptsächlech d’Consomméiere vu méi staarkem Alkohol Schold dodrun, déi en plus och nach bëlleg ze kréie sinn.

D'Raus-Go-Mentalitéit hätt donieft och geännert. Um 22 Auer geet eng Party lass, fréier war dat 19, 20 Auer, do huert een deemno wéi scho genuch intus, ier et richteg ugeet.

AUDIO: Dr. Jean-Marc Cloos (Extrait1)

Dobäi kéim, dass ëmmer méi Flatrate-Partyen organiséiert géifen, wou een also ee méi deieren Entréespräis bezilt an dann awer à volonté all Zort vun Alkohol drénke kéint. Et wier dofir dréngend néideg ze handelen, seet den Dr Cloos.

Konkret Fuerderung wär den Alter ze kontrolléieren, an deen och eventuell an d'Luucht ze setzen. Op Partyen verschidden Alkoholer einfach net méi unzebidden oder se méi deier ze maachen an éischter a Richtung Softdrinks oder Béier-Wäin ze goen.

AUDIO: Dr. Jean-Marc Cloos (Extrait2)

Et wier endlech un der Zäit, dass den nationale Alkohol-Aktiounsplang, deen eigentlech schonn 2016 fäerdeg gestallt gouf, elo géif ëmgesat gëtt.

De Reportage den Owend am Journal op RTL Télé Lëtzebuerg.