D’Santé recommandéiert jidderengem sech géint d’Riedelen impfen ze loossen. Besonnesch Leit, déi no 1980 gebuer goufen, sollen hir Impfkaart kontrolléieren

Bei enger Ëmfro op RTL.lu, wou 204 Persoune matgemaach hunn, hu sech grad emol 9 Prozent géint d'impfen ausgeschwat. Si sinn zum Deel der Meenung, datt d'Impfe selwer eréischt krank géif maachen, well an den Impfstoffer geféierlech Substanzen dra sinn. Fir si ass déi aktuell Diskussioun éischter Angscht- a Geldmaacherei.

D’Majoritéit vun den Leit hu sech bei der Ëmfro fir Impfungen ausgeschwat, well se Mënscheliewe géife retten. Fir Epidemien ze verhënneren a liewensgeféierlech Krankheeten z'eliminéieren a virun allem fir sech selwer an awer och aner Persounen ze schützen.

Eng Impfflicht gëtt et zu Lëtzebuerg net, d'Entscheedung läit also bei de Leit, respektiv den Elteren, selwer. Sollt een dorop verzichten, muss ee sech de Konsequenzen allerdéngs och bewosst sinn. Esou ginn et verschidde Betreiungsstrukturen, déi refuséieren, fir Kanner opzehuelen, wann dës net geimpft sinn.

Dëst Joer schonn 18 bestätegt Fäll vu Riedelen zu Lëtzebuerg

VIDEO: 18 bestätegt Fäll vu Riedelen zu Lëtzebuerg
Leit, déi no 1980 gebuer goufen, solle kontrolléieren, ob se iwwerhaapt richteg geimpft sinn.

Nodeems d’Weltgesondheetsorganisatioun Alarm geschloen huet, well sech d’Fäll vu Riedelen weltwäit vervéierfacht hunn, stellt sech d’Fro no der Situatioun hei zu Lëtzebuerg. De Gesondheetsministère confirméiert, dass dëst Joer hei am Land eng 18 Fäll diagnostizéiert goufen. Déi infizéiert Persounen sinn tëscht 8 an 30 Joer al.

D’Santé recommandéiert jidderengem, sech géint d’Riedelen impfen ze loossen. Besonnesch déi Leit, déi no 1980 gebuer goufen, solle kontrolléieren, ob se korrekt respektiv iwwerhaapt geimpft goufen. Wann net, sollte se dat onbedéngt nohuelen.

D’Riedelen gehéiere weltwäit nämlech zu de geféierlechste Kannerkrankheeten déi héich ustiechend sinn, wéi den Dr Pierre Weicherding vun der Inspection Sanitaire vun der Santé erkläert.

AUDIO: Den Dr. Pierre Weicherding