Vun e Méinden un ass de Robert Traversini net méi Buergermeeschter vun Déifferdeng. De Replay vu senger Pressekonferenz elo online op RTL.lu.

Dat huet de grénge Politiker am spéide Moien am ale Stadhaus virun der Press matgedeelt. An enger Deklaratioun vu knapp 3 Minutte sot sech de Roberto Traversini houfreg iwwert déi 5 Joer, déi hien als Gemengepapp un der Spëtzt vun der 3.-gréisster Stad vum Land stoung. Hie wéilt mat sengem Schrëtt géint de Vertrauensverloscht an d'Politik handelen an dozou bäidroen, dass nees Rou an d'lokal Politik kënnt; elo bräicht hie virun allem Rou. Hien zitt sech och aus dem Gemengerot zeréck.

VIDEO: De Roberto Traversini huet demissionéiert
Um Freideg de Moien huet de Roberto Traversini säi Récktrëtt als Buergermeeschter vun Déifferdeng ugekënnegt.

Nächste Buergermeeschter dierft also RTL-Informatiounen no de Georges Liesch ginn. Déi jonk Léierin Julie Werecki soll an de Conseil noréckelen.

Georges Liesch

Hannergrond ass déi ominéis Gaardenhaischen-Affär. Et geet jo ëm méiglech Interessekonflikter, dat ënnert anerem wéinst Aarbechte vun der Beschäftegungsinitiative CIGL an engem Haus, dat de Buergermeeschter geierft huet a wéinst dem Ëmklasséieren vum Terrain am neie PAG.

AUDIO: Demissioun Traversini: De Reportage vum Eric Ewald

Reaktioune vun déi Gréng, CSV an déi Lénk

AUDIO: Reaktiounen no Demissioun vum Traversini / Rep. Eric Ewald

De Christian Kmiotek war um Freideg den Owend um Platto op RTL Télé Lëtzebuerg. Hei huet de President vun deene Grénge matgedeelt, datt d'Onscholdsvermuddung weider beim Roberto Traversini gräifen, dofir géif een och net fuerderen, datt hie säi Mandat an der Chamber géif nidderleeën. D'Situatioun wier wuel en Imageschued fir d'Partei, ma och fir all d'Politiker am Land. Op d'Successioun vum Felix Braz ugeschwat, sot de Christian Kmiotek, datt dëst net op der Agenda vun der Partei géif stoen. Et géif een d'Situatioun awer analyséieren, och déi, vun engem méigleche Successeur.

De grénge Gemengerotsmember Fränz Schwachtgen huet an enger 1. Reaktioun vun engem, Zitat, „Schock fir eis all“ geschwat, deen een elo verdaue misst.

Fir den Tom Ulveling vun der CSV wär ee sengerzäit eppes agaange mat enger Partei, an dozou stéing een. Déi Gréng an d'CSV hätte gutt zesumme geschafft, soudass net ze gesi wär, wat ee sollt änneren.

Hie géif net mengen, dass et zu Neiwale komme misst, sou den Tom Ulveling, deen och net d'Ambitioun hätt, fir Buergermeeschter ze ginn.

An den nächsten Deeg wäerten d'Koalitiounspartner déi Gréng an CSV intensiv Gespréicher féieren; an deem Sënn war e Freideg den Owend ewell eng Reunioun. An der Suite dovu gouf e Communiqué publizéiert an deem et heescht, datt ee weider der Iwwerzeegung wär, datt de Koalitiounsprogramm nach ëmmer eng staark Basis fir eng nohalteg Entwécklung vun der Gemeng ass. Déi Gréng an d'CSV hätten doriwwer eraus zesumme vill Opweises an et wären nach Dossieren ofzeschléissen. Dofir wéilt een déi gemeinsam Aarbecht weider maachen, fir Déifferdeng als dynamesch, innovative a liewenswäert Süd-Metropol op der Landkaart ze etabléieren.

D'Gemengerotsmembere wäerten sech dann och an den nächsten Deeg iwwert déi zukünfteg personell Besetzung vum Gemengerot beroden an d'Ëffentlechkeet wäert zäitno informéiert ginn, sou nach déi Gréng an d'CSV am Schreiwes.

Wat war geschitt?

Den Déifferdenger Buergermeeschter Roberto Traversini ass déi lescht Deeg ëmmer méi politesch ënner Drock geroden. Um Freideg de Moien ass hien eng weider Kéier virun d'Presse getrueden. En Donneschdeg am fréien Owend huet d'Déifferdenger Gemeng déi deementspriechend Invitatioun erausgeschéckt.

A sengem perséinlechen Numm hat den Député-Maire fir e Freideg de Moien 11 Auer eng Pressekonferenz aberuff, dat an der Suite vun der Gemengerotssëtzung vun e Mëttwoch, wéi et am Schreiwes heescht.

E Mëttwoch hat de Roberto Traversini am Conseil Explikatioune ginn, wat d'Affär ëm ee Gaardenhaischen an d'Ëmklasséierung vun engem eegenen Terrain an de PAG ugeet. De Gemengepapp hat Feeler zouginn. Déi Lénk an d'DP aus dem Déifferdenger Gemengerot hat schonn d'lescht Woch d'Demissioun vum grénge Buergermeeschter gefuerdert. Sou ee Schrëtt hat dee Betraffenen nach e Mëttwoch ausgeschloss a sot just, dass hie wéilt méi kuerz trieden a verschidde Mandater opginn.

Virun der Pressekonferenz hat de Buergermeeschter eisen Informatiounen no eng Entrevue mat der CSV, dem Koalitiounspartner vun déi Gréng am Déifferdenger Gemengerot.

Traversini hat de Verwaltungsrot vum CIGL iwwert Irregularitéit informéiert

De CIGL Déifferdeng reagéiert op d'Reprochen, déi un de Buergermeeschter Traversini adresséiert goufen, dee President vum genannte Centre d'Initiative ass.

Et gëtt confirméiert, datt Leit vum CIGL am Privathaus geschafft hunn, dat de Buergermeeschter geierft huet. An engem Communiqué ginn d'Aarbechten am Detail opgezielt. Ënner anerem goufen op der genannter Adress Miwwele recuperéiert an et gouf eng intern Formatioun fir Holzfassaden do organiséiert.

Weider heescht et, datt de Roberto Traversini de Verwaltungsrot vun der Beschäftegungsinitiativ zu engem gewësse Moment doriwwer informéiert hätt, datt et eng Irregularitéit vu senger Säit gouf. An zwar hätten am Juli dräi Leit vum CIGL un engem Gelänner geschafft, wouriwwer déi aner Membere vum Conseil d'administration awer net Bescheed woussten.

Et wier ee sech bewosst, datt dës Demarche net der sozialer Finalitéit vum Centre géing entspriechen. Déi Aarbechten misste facturéiert ginn.

Vum Verwaltungsrot heescht et, datt d'Situatioun an den nächste Woche géing evaluéiert ginn an datt een, wann néideg, Moossname géing ergräifen.