En Dënschdeg de Moie gouf den neien IRM a Präsenz vum Gesondheetsminister Etienne Schneider offiziell ageweit.

7 Joer no der Demande bei der CNS ass den neie Magnéit-Resonanz-Apparat am Centre Hospitalier also Realitéit. Gutt 20 Patienten kënnen den Dag passéieren. De Käschtepunkt läit bei 1,5 Milliounen Euro. D'Zil ass et, d'Waardezäiten däitlech ze verkierzen. Am Grand-Duché soll de Patient net méi laang waarden wéi an den Nopeschlänner, sou de Gesondheetsminister.

Neien IRM / Reportage Pit Everling (30.10.19)

Etienne Schneider: "Et wier net normal, datt Leit an engem räiche Land wéi Lëtzebuerg iwwert d'Grenz misste goen, fir en IRM a raisonnabelen Delaien ze kréien. Et komme jo 4 nei IRMen: Deen um Kierchbierg funktionéiert, deen am CHL elo och, deen zu Esch gouf geliwwert an deen am Nordspidol ass och ënnerwee."

Etienne Schneider iwwert den neien IRM

Am CHL geet een dovunner aus, datt d'Delaien däitlech verkierzt wäerte ginn. Laangfristegt Zil ass et, bannent 3 Wochen un d'Rei ze kommen, wa keng Urgence virläit. Vun haut op muer wier dat awer net ze realiséieren, seet den Dokter Romain Nati, Direkter vum CHL.

Romain Nati: "Dat ënner anerem, well weider Doktere musse rekrutéiert ginn, fir mat den zousätzlechen Apparater ze schaffen."

Romain Nati iwwert den neien IRM

Den neien IRM funktionéiert an engem Container, dee mam Kliniksgebai verbonnen ass. D'Installatioune goufen an Holland gebaut. Se goufen an zwee groussen Deeler mat Camionen op Lëtzebuerg bruecht an duerno mat engem Kran en place gesat.

Beim Thema IRM stellt sech dann natierlech d'Fro vun eventuelle privaten Installatiounen. D'Ex-Gesondheetsministesch Lydia Mutsch hat 2017 eng Demande refuséiert, eng Decisioun déi dëst Joer vun der Cour Constitutionnelle annuléiert gouf. De Successeur Etienne Schneider seet, et wéilt een op dat definitiivt Uerteel vum Verwaltungsgeriicht waarden. Ma hie verschléisst sech där Iddi allgemeng och manner. D'Zil misst eng gutt Offer an attraktiv Gesondheetsberuffer sinn.

Etienne Schneider: "Et gëtt diskutéiert, wou et Ouverturë fir d'Zukunft kënne ginn an ob et eng Méiglechkeet ass, fir eng Rei Apparaturen och an Doktesch-Praxen z'installéieren."

Et soll zu kenger Privatiséierung kommen, ma wann een d'Spideeler wéilt entlaaschten an d'Dokteschberuffer méi interessant wéilt maachen, da sollt een an déi Richtung diskutéieren.

Etienne Schneider: "D'Spideeler sollen awer net a Konkurrenz gesat gi mat Privat-Praxen an d'Qualitéitsstandarde missten och déi selwecht sinn."

Den Ament geet d'Zuel vun de Magnéit-Resonanz-Apparater zu Lëtzebuerg vu 7 op 11 erop.