D'Presidentin vun ADR-Fraen, d'Sylvie Mischel, suergt mat Aussoen op der Online-Plattform Facebook fir entsate Reaktiounen.

An dësem Post gesäit een eng Foto vum LSAP-Ausseminister Jean Asselborn mat engem Grupp vu Refugiéen aus Campen aus Libyen, Eritrea, Sudan a Somalia, déi viru kuerzem Recht op eng international Protektioun zu Lëtzebuerg kruten.

Op dës Foto huet d'Sylvie Mischel, eng vun de 5 Vize-Presidente vun der ADR-Partei, "Der LSAP hiert éischt Wahlplakat fir 2023" geschriwwen - driwwer dann en Text, an deem si sech opreegt, datt vill Migranten zu Lëtzebuerg wieren an datt déi aktuell Regierung net genuch géif no de Lëtzebuerger kucken.

Den ADR-Parteipresident Jean Schoos distanzéiert sech am RTL-Interview vun dësem Post.

Extrait Jean Schoos

Condamnéiere wollt de Jean Schoos de Facebook-Post net - hie géif awer mat der Sylvie Mischel an och mam Fernand Kartheiser a mam Gast Gibéryen d'nächst Woch doriwwer schwätzen.

Exekutiv-Comité vun der ADR kënnt e Méindeg zesummen

"Ech wäert muer (Méindeg) déi néideg Mesuren an eisem Exekutiv-Comité aleeden géint d'Sylvie Mischel", esou d'Reaktioun vum Generalsekretär vun der ADR Alex Penning e Sonndeg de Mëtteg nodeems d'Presidentin vun ADR Fraen an eng vun de Vize-Presidente vun der Partei fir entsate Reaktioune gesuergt huet. "

"Et mussen déi néideg Konsequenzen gezu ginn, soss demissionéieren ech...", sou nach den Alex Penning.

Den Exekutiv-Comité vun der ADR kënnt dann e Méindeg de Mëtteg zesummen, fir iwwert d’Konsequenze vum Post vun der Sylvie Mischel ze beroden.

Den Alex Penning um Mikro vum Claudia Kollwelter

Reaktioune vum Jean Asselborn an dem Franz Fayot

De Parteipresident vun der LSAP, déi viséiert ass, weist sech an enger éischter Reaktioun wéineg iwwerrascht vum Post vun der Sylvie Mischel. D’ADR géif ëmmer méi zu enger Lëtzebuergescher AfD ginn, sot de Franz Fayot.

Extrait Franz Fayot

D’Foto, déi de Jean Asselborn op de sozialen Netzwierker gedeelt huet, géing dem Franz Fayot no Generositéit, Empathie a Solidaritéit mat de Leit weisen, déi Hëllef brauchen. Den LSAP-Parteipresident ass houfreg drop, datt seng Partei sech déi Zort Politik op de Fändel schreift an datt ee mam Ausseminister eng Persoun hätt, déi dat héichhale géif.