Ob d'Sylvie Mischel bei hirem Patron der Lëtzebuerger Zentralbank och Suitten erwaarde muss, ass aktuell nach net gewosst.

Den Exekutivcomité vun der Partei souz e Méindeg de Mëtteg méi ewéi zwou Stonne beieneen, fir genee d'Fro vun de Konsequneze vum Facebook-Post vun der Sylvie Mischel ze klären.

Et konnt net direkt eng Decisioun geholl ginn, well déi Concernéiert net bis zum Schluss hätt kënnen an der Reunioun derbäi sinn. Effektiv hat d'Sylvie Mischel d'Parteibüroen an der Ënneschtgaass schonn no enger knapper Stonn verlooss. D'Presidentin vun den ADR-Frae war nämlech am Nomëtteg bei hire Patron convoquéiert ginn, d'Sylvie Mischel schafft op der Lëtzebuerger Zentralbank.

Am Laf vum Owend huet sech d'Partei dann an engem e Communiqué zum Facebook-Post an de Suitte geäussert. D'Sylvie Mischel huet an dësem Fall selwer decidéiert, hir Ämter an der Partei als Vizepresidentin an als Presidentin vun den ADR-Fraen néierzeleeën.

Am Communiqué vun der ADR heescht et wuertwiertlech: „datt weder si perséinlech, nach d’ADR als Plattform fir niddreg Gefiller kënne mëssbraucht ginn“.

D'ADR géing d'Decisioun vun der Sylvie Mischel unerkennen. D'Partei géing hir Asylpolitik iwwerdeems bäibehalen, bei Kommentaren um Internet wieren awer Grenzen iwwerschratt ginn an dovu géing ee sech distanzéieren.

D'Sylvie Mischel hat op der Online-Plattform Facebook fir entsate Reaktiounen gesuergt. Si hat eng Foto gepost, wou den Ausseminister Jean Asselborn mat Refugiéen ze gesinn ass a si hat an hat ënner anerem verlaangt, datt sech mol méi ëm d'Leit vun hei sollt gekëmmert ginn.