Knupperten a Rakéiten op Silvester an d'Luucht schéissen. Déi eng schwieren drop, anerer kënnen dee Kaméidi net ausstoen ...

Nieft Nationalfeierdag ass Silvester dee Rendezvous, wou nawell gäre Freedefeier ofgeschoss ginn.

An de meeschte Gemengen ass et allerdéngs ganz d'Joer iwwer verbueden, fir ebe Freedefeier ofzeschéissen. Oder et brauch een eng speziell Autorisatioun vum Buergermeeschter.

Verbueden

D'Gemengen Diddeleng a Konsdref hunn da schonn den 12. Dezember matgedeelt, datt et op hirem Territoire verbuede wier, fir Freedefeier ofzeschéissen. Et gouf präziséiert, datt d'Gemeng keng speziell Autorisatioune wäert ausstellen.

Dat selwecht gëllt fir d'Gemeng Ierpeldeng-op-der-Sauer, déi dat schonn den 10. Dezember verëffentlecht huet. Aus Respekt virun der Nuetsrou vun de Matbierger an aus Respekt virun den Déieren, géif et fir d'Silvesternuecht 2019/2020 keng Autorisatioun fir Freedefeier oder Knupperte ginn.

Och d'Gemeng Bäerdref huet matgedeelt, datt et verbuede wier, Freedefeier ofzeschéissen. Si géifen och keng Geneemegunge ginn, well sech déi leschte Joer dacks net un dat gehale gouf, wat hei ofgemaach war. D'Gemeng réit de Leit, déi Suen, déi si soss an den Himmel geschoss hunn, fir de gudden Zweck ze spenden.

Och an de Gemengen Lenneng, Koplescht, Réimech, Hesper, Steesel, Suessem, Péiteng, Mäerzeg an Esch-Uelzecht dierf kee Freedefeier ofgeschoss ginn. Och an der Ärenzdallgemeng gëtt keng Ausnam gemaach.

Zu Schëffleng huet de Gemengerot d'Decisioun geholl, datt um Terrain vun der Gemeng dat ganzt Joer iwwer kee Freedefeier méi däerf ofgeschoss ginn. Also och net op Silvester. Et wäert een an Zukunft och keng Autorisatioune méi dofir erausginn.

Um Territoire vun der Gemeng Manternach ass kee Freedefeier erlaabt. Dat Selwecht gëllt fir d'Gemengen Habscht, Nidderaanwen, Feelen, Helperknapp, Steesel an an der Gemeng Parc Housen.

Gemeng Conter: "D'Joer 2019 geet sou lues op en Enn zou, an en vue vun de Feierdeeg, fir d'Joer ofzeschléissen, informéiert de Schäfferot vun der Gemeng Conter, dass kee Freedefeier méi um Territoire vun der Gemeng erlaabt gëtt. Dozou gehéieren esouwuel Knupperten, Rakéiten, wéi och aner explosiv Géigestänn. Mir bieden d'Awunner sech un dës Mesuren ze halen, aus Respekt zu de Matbierger, den Déieren an och der Ëmwelt. De Schäfferot seet Merci fir Äert Verständnes a wënscht Iech schéi Feierdeeg."

Un d'Awunner vun der Gemeng Stroossen ass et de Message: "Fir dass alleguerten d’Awunner vun de Feierdeeg profitéiere kënnen, soll ee Mënsch an Déier och beim Feiere respektéieren. Dofir ass et wéinst der ëffentlecher Sécherheet a Propretéit, um ganzen Territoire vun der Gemeng Stroossen verbuede Freedefeier ze schéissen a Knupperte lasszeloossen. Dëst gëllt och fir d’Silvesternuecht"

Zu Leideleng, Wëntger, Fëschbech an an der Gemeng Helperknapp si Freedefeier a Knupperten an der Uertschaft an och an engem Ëmkrees vu bis zu 100 Meter ronderëm d'Limitte vun der Uertschaft verbueden.

Och an der Gemeng Esch-Sauer, wéi och zu Bauschelt, ass an der Nuecht vum 31. Dezember op den 1. Januar d'Freedefeier komplett verbueden.

Och net erlaabt ass d'Freedefeier zu Réiden un der Atert.

Verbueden ass et an der Gemeng Schengen, wéi och an der Gemeng Fluessweiler.

Erlaabt

Zu Dippech dogéint ass Freedefeier erlaabt, dëst awer just tëscht Mëtternuecht an 0.15 Auer. D'Gemeng rifft d'Leit dann och op, fir hiren Dréck nom Freedefeier ewechzemaachen.

D'Gemeng Gréiwemaacher erlaabt d'Freedefeier esouguer tëscht 23:55 Auer an 0:30 Auer an der Nuecht vum 31. Dezember op den 1. Januar.

An der Gemeng Mamer ass Freedefeier prinzipiell net verbueden, déi Responsabel leeën de Leit awer un d'Häerz hir Rakéite just tëscht 23 an 00.30 Auer an der Nuecht op den 1. Januar ofzeschéissen an all Sécherheetsmesuren anzehalen, sou datt keen an näischt zu Schued kënnt.

Zu Monnerech erlaabt vu 23.55 bis 0.25 Auer. Vun 23.45 un an dat fir eng dräivéierel Stonn ass et dann an de Gemenge Reckeng op der Mess a Rouspert-Mompech erlaabt.

D'Stad Lëtzebuerg huet präziséiert, dass et net verbueden ass Rakéiten an d'Luucht ze schéissen, am Prinzip bréicht een dofir awer d'Autorisatioun vun der Buergermeeschtesch. Et wier och jidderengem fräi iwwerlooss, a sengem Gaart Knupperten lasszeloossen. Et ass awer nach den Appell, op seng eege Sécherheet an déi vun de Spectateuren opzepassen.

An der Gemeng Géisdref ass tëscht 23.30 an 0.30 vum 31. Dezember op den 1. Januar Freedefeier erlaabt.

D'Gemeng Déifferdeng erlaabt Freedefeier vun 23.55 bis 0.15 Auer, anengems ass et den Appell seng Matbierger, d'Déieren an d'Ëmwelt ze respektéieren.

D'Gemeng Klierf erlaabt d'Freedefeier tëscht 00.00 an 00.20 Auer. E fräiwëllege Verzicht op d'Freedefeier wier awer wëllkomm.

D'Gemeng Ëlwen huet matgedeelt, datt d'Ofschéisse vu Knupperten op Silvester just vun 23.45 bis 00.15 Auer erlaabt ass. Et soll een op d'Sécherheetsbestëmmungen oppassen an den Dreck duerno vun der Strooss an ëffentleche Plazen fortraumen.

Zu Wolz an Iechternach ass et tëscht 23.45 an 0.15 Auer erlaabt Freedefeier ofzeschéissen.

D'Gemeng Miersch mellt dann, dass et zwar erlaabt wier, fir Freedefeier ofzeschéissen, ma et soll een awer iwwerleeën et aus Respekt viru Matmënschen an Déieren ze reduzéieren, respektiv souguer komplett ewechzeloossen.

Zu Biissen ass et den Appell un d'Awunner, fir op Silvester responsabel mat Knupperten ëmzegoen. Et soll een net nieft Gebaier an och net ze laang Freedefeier ofschéissen. Genee sou mellt dat och d'Gemeng vu Bartreng. Et gëtt ënnerstrach, dass jiddwereen selwer responsabel ass fir säi Freedefeier.

Wéi et vun der Gemeng Rëmeleng heescht, ass Freedefeier op ëffentleche Plazen ouni Autorisatioun vum Buergermeeschter verbueden (Stroossen, Trottoir, Parkplazen...). Tëscht 00.00 an 00.30 Auer ass et an der Silvesternuecht awer erlaabt, vu Privatterrainen aus Feierwierkskierper ofzeschéissen. All Persoun ass gebieden, den entstanenen Offall selwer z'entsuergen.

Zu Schieren ass Freedefeier an der Nuecht op den 1. Januar vun 23.45 Auer bis 00.30 Auer erlaabt.

Dozou ee Message vun der Ëmweltverwaltung:

"Freedefeier ass flott ze kucken a gehéiert fir vill Leit mat zum Joreswiessel dozou. Wann är Gemeng d'Freedefeier fir Privatleit erlaabt, soll een trotzdeem w.e.g dobäi net vergiessen herno och den Offall deen ee produzéiert huet nees propper ze maachen (sief dat beim Noper um Terrain, op der Strooss oder am Bauer senger Wiss). Passt also w.e.g op är direkt Ëmwelt op.

Dozou gehéiert och géigesäitege Respekt, wann ee beispillsweis weess, dass dem Noper seng Hausdéiere Panik kréie w.e.g virdru Bescheed soe goen, dass dës sech kënnen do drop preparéieren, an dann eventuell an déi aner Richtung knuppen. Merci an e gudde Rutsch".

Deelt eis et mat!

Erlaabt Dir als Gemeng Freedefeier op Silvester? Brauch ee bei Iech eng Autorisatioun? Oder ass et komplett verbueden?

Sot eis Bescheed, mat enger Mail op menggemeng@rtl.lu

Esou kënne mir Är Bierger an dësem Dossier um neiste Stand halen.