De 5. annoncéierte Samu an Zesummenaarbecht mat der Air Rescue wäert vum 1. Abrëll un an den Asaz kommen.

Fir d'éischte Kéier zanter dem éischte positiv geteste Covid-19-Fall hei zu Lëtzebuerg Enn Februar huet um Dënschdeg de Moien elo och d'Inneministesch Taina Bofferding zesumme mam Direkter vum CGDIS dem Paul Schroeder op enger Pressekonferenz Stellung geholl. D'Rettungsdéngschter hei am Land wäre preparéiert.

Resumé vun der Pressekonferenz Bofferding/Schroeder

Preparéiert a prett, wann d'Kris sech eventuell verschlëmmert. Aktuell schaffe ronn 4.200 Fräiwëlleger fir de CGDIS a 770 Haaptberufflecher, a Leit aus der Administratioun. Dobäi dierft een och net vergiessen, dass een nieft dem Coronavirus och nach normal Urgencë misst en charge huelen, wéi zum Beispill Accidenter am Stot oder am Verkéier. Eng zousätzlech Hëllef wäert do de 5. Samu sinn, deen eigentlech eréischt Ufank Mee sollt an den Asaz kommen, erkläert d'Inneministesch.

Taina Bofferding: „An ech kann iech haut matdeelen, dass de 5. annoncéierte Samu an Zesummenaarbecht mat der Air Rescue, dass mer deen elo an dëser Kris scho kënne virzéien. Dat heescht ab dem 1. Abrëll ass deen operationell. Do ass dann eng Ekipp, déi vum Findel aus wäert starten an esou kann an den Asaz geschéckt ginn. Dat ass eng Ekipp aus engem Anästhesiste mat Infirmier.“

De 5. annoncéierte Samu an Zesummenaarbecht mat der Air Rescue wäert vum 1. Abrëll un an den Asaz kommen. Also méi fréi wéi ursprénglech geplangt. Dës Ekipp, déi aus engem Anästhesist an engem Infirmier besteet, wäert vum Findel aus an den Asaz kommen. Dat huet d'Inneministesch Taina Bofferding den Dënschdeg de Moien op enger Pressekonferenz annoncéiert. D'Optimiséierung vun der Noutfallversuergung wär nämlech eng absolut Prioritéit vun der Regierung.

Domadder ginn et elo 2 Samuen am Land, déi net a Spideeler stationéiert sinn, den neien um Findel an deen zu Hesper, an dat wär an dëser Krisenzäit eng Stäerkt, well een d'Spideeler kéint entlaaschten, betount den Direkter vum CGDIS Paul Schroeder.

© SIP/JULIEN WARNAND

Beim CGDIS sinn d'Leit natierlech un der Front an dofir misst ee sech och op e gréisseren Ausfall preparéieren, erkläert de Paul Schroeder.

Paul Schroeder: Mir hunn am Moment 15 Persounen, déi am auto-isolement sinn, mir hunn 9 Leit, déi an der auto-quarantän sinn, mir hu 6 Leit, déi am Isolement sinn a mir hunn och eng Persoun, déi hospitaliséiert ass. Dat heescht, dat sinn am ganzen 31 Leit, déi betraff sinn.

Den 112 wär eng essentiell Struktur, dofir misst een och garantéieren, weiderhi 24 Stonnen op 24 ze fonctionéieren a méiglech Nei-Infektiounen ze verhënneren.

Paul Schroeder:
Mir hunn hei an der Stad am CIS Lëtzebuerg eng Desinfektiounsplaz ageriicht, fir all d'Ambulanzen, egal vu wou se kommen, fachgerecht ze desinfizéieren no engem Asaz. Mir hu weider Mesurë geholl, fir d'Leit ze schützen, andeems mer dem Personal an den Ambulanzen, déi virdrun och zu 3 konnte fueren, elo gesot hunn, si kéinten nëmmen zu 2 fueren, fir ebe Personal och an der Reserv ze halen, fir kënnen an der Dauer weider ze fonctionéieren.

Et wär ee bereet fir alles, wat do géif op een zoukommen, sou nach den Direkter vum CGDIS.

© SIP/JULIEN WARNAND