Net manner wéi 14 konkret Punkte goufen e Mëttwoch am Regierungsrot an der Lutte géint d’Corona-Kris guttgeheescht.

Ënnert anerem huet d‘Regierung zousätzlech direkt Aidë fir d’Independante vun 2.500 Euro decidéiert. Eenzeg Konditioun: et muss een ugemellt sinn a cotiséieren.

Dernieft reegelt e Reglement grand-ducal, dass eng Krankschreiwung wärend der Kris, net an d’Period vu 26 Woche fält, wou ee géint e Licenciement protegéiert ass. Den Delai gouf hei also ausgesat.

Da gëtt et eng zäitlech Derogatioun fir Beruffs-Camions-Chauffeuren, déi u sech eng speziell Formatioun misste maachen, fir duerch d’EU ënnerwee ze sinn. Dës gouf ausgesat, fir dass et op de Versuergungsweeër net zu Enkpäss kënnt, well et u Chauffeure géif feelen.

E speziellt Reglement erlaabt dann och elo, dass ee Schutzmaske géint de Virus op sämtlechen ëffentleche Plazen däerf unhunn. An engem Schreiwes huet d'Regierung sech um Mëttwoch och nach eng Kéier zu dësem Thema geäussert an Tipps zur Notzung vu Schutzmaske ginn.

De Wirtschaftsministère huet eng zousätzlech Enveloppe vun 30 Milliounen Euro annoncéiert fir d’Entwécklung an d’Produktioun vu Produiten am Kampf géint de Covid-19 ze ënnerstëtzen.

PDF: Schreiwes Regierungsrot

OGBL: Et si Mesuren, déi an déi richteg Richtung ginn

Sou schreift et den OGBL en Donneschdeg an engem Communiqué, iwwert déi nei Mesuren, déi e Mëttwoch am Regierungsrot festgehal goufen.

Ausdrécklech begréisst gëtt d’Reglement dat reegelt, dass eng Krankschreiwung wärend der Kris, net an d’Period vu 26 Wochen fält, wou ee géint e Licenciement protegéiert ass, an dass deen Delai elo ausgesat ass.

Et freet een sech bei der Gewerkschaft awer, firwat am selwechte Reglement eng Ouverture gelooss gouf, dass een wéinst „faute grave“ kann gekënnegt kréien am Laf vun enger Period vun „incapacité du travail“, wat a Normal-Zäiten net méiglech wier.

Den OGBL gouf dann informéiert, dass verschidden Employeuren géife mengen, dass de « congé pour raisons familiales extraordinaire », grad wéi d’Incapacité de travail pour cause de maladie, just zu 80% géife rembourséiert ginn.

Dat wier net esou, an dat gouf och net méi spéit wéi gëschter, wärend enger Réunioun vum Verwaltungsrot vun der Gesondheets-Keess confirméiert, dass hei zu 100% rembourséiert gëtt.

PDF: Pressecommuniqué vum OGBL

RTL