D'Reprochë komme vun de Famillje vu ronn 30 Clienten aus dem Blannenheem, déi hiren Hänn kee Rot méi wëssen.

"D'Situatioun am Blannenheem zu Rolleng bei Miersch ass komplett entgleist. D'Stëmmung ass kapott." Dat soe Leit, déi Familljememberen am Blannenheem hunn.

Bis elo hu sech d'Famille vun engen 30 Leit (vun am Ganzen 180 Awunner) zesummegedoen, d'Patientevertriedung an elo och d'Press kontaktéiert, well se hiren Hänn kee Rot méi wëssen.

Alles dat, esou soen se, hätt net direkt eppes mam Coronavirus ze dinn, quitt, datt sech d'Situatioun duerch d'Pandemie zougespëtzt hätt.

"An éischter Linn geheie mir dem Blannenheem vir, dass si ons léif Bewunner dobannen, eigentlech net méi wéi Mënsche behandelen, éischter wéi en Objet. Am Blannenheem dréint sech den Ament, zënter den Här Hoffmann net méi do ass, alles just ëm d'Geld". Dat seet d'Patrice Klepper-Boever, där hire Mann am Blannenheem lieft.

Si schwätzt fir déi 30 Leit, déi sech zesummegedoen hunn. Si hunn an de leschte Wochen eng Lëscht gemaach, op där alles steet, wat an hiren Ae schif leeft. Eigentlech zwou. Eng mat Doleancen a Corona-Zäiten an eng mat Doleancen an normalen Zäiten.

"Mir bezuelen all Joer méi, d'Leeschtunge ginn erof, et gëtt an allen Ecker gespuert, d'Famille kréien absolut keng Informatiounen vum Haus, et muss een alles nofroen, op E-Maile kritt ee keng Äntwert. D'Atmosphär am Heem ass äiseg. Vun Häerzlechkeet a Respekt virum Mënsch keng Spuer. D'Leit kréien en Dokter vum Haus opgeschwat, se gi géint hire Wëlle geimpft. D'Iesse gëtt reduzéiert, et léisst ze wënschen iwwereg."

Alles dat si just e puer vun de Punkten, déi op deene Lëschten ze liese sinn an dann nach een, deen een eventuell direkt nach eng Kéier liest: "Kënnegung vun der Fondatioun, fir aus dem eegenen Appartement". Hei ass eng Fra betraff, déi zënter 2005 Proprietär vun enger Wunneng an der Residence Hertha Winandy ass, déi zum Blannenheem gehéiert.

Hire Mann, deen net wëll mam Numm genannt ginn, explizéiert, datt hien zënter méi laangem Diskussioune mam Generaldirekter huet wéinst der Präispolitik. Seng Fra misst fir den Hebergement bezuelen, obschonn si Proprietär vun der Wunneng ass. An Tëschenzäit huet nieft dem Konsumenteschutz schonn e Mediateur intervenéiert, dono en Affekot.

"No villen Diskussiounen, d'Enn vum Lidd ass, datt e meng Fra eraus komplimentéiert oder op Lëtzebuergesch gesot, esouguer erausgeheit huet. Dat heescht, ech sinn elo an der Situatioun, wou ech am Fong geholl net méi weess, wat elo nom 15. Juni, bis dohinner huet e mer Frist gestallt, oder menger Fra d'Frist gestallt, wat dann elo nom 15. Juni geschitt. Wou ech meng Fra dann nom 15. Juni soll ënnerdaach kréien."

Virun e puer Deeg huet en anere Mann sech an engem Mail un d'Presse adresséiert a schockéiert gewisen iwwert den Zoustand vu sengem Papp. Deen hätt hien net méi erëmerkannt, en hätt Péng gehat a keen hätt him kënne soen, ob en Dokter nom Mann gekuckt hätt.

Blannenheem zu Rolleng / Reportage Dany Rasqué (1)

Hëllef gefrot beim alen Direkter

D'Leit, déi sech zesummegedoen hunn, soen, déi Problemer géif et gi vun un, datt d'Blannenheem en neie Generaldirekter huet. Si hunn och de fréieren Direkter, de Roger Hoffmann kontaktéiert an hien ëm Ënnerstëtzung gefrot. Hien ass Enn 2016 no 33 Joer un der Spëtzt vum Haus an d'Pensioun gaangen.

Déi Mënschlechkeet, déi mir zu menger Zäit esou héich gehalen hunn, vun där bleift kee Fonke méi iwwereg, seet de Roger Hoffmann am RTL-Interview. Hien hëlt kee Blat virun de Mond a blimmelt sengem Successeur definitiv net. Duerch hie wier e Revirement komm:"Ech kann en doduerch erklären, datt dee Mann op der falscher Plaz ass. Ech kann et net anescht formuléieren. En Direkter an enger Institutioun wéi där do, dee muss frou si mat Leit, dee muss do si fir d'Leit. E muss kënnen engem an d'Gesiicht kucken a mat de Leit schwätzen an den Här Grün, dee kritt dat mam beschte Wëllen net hin."

Genee dat wier och d'Ursaach vun all de Problemer, betount de Roger Hoffmann. Fir hie gëtt et just eng Léisung: "Do misst de Conseil d'administration mol eng Kéier virun d'Verantwortung gestallt ginn a sech agestoen, datt se de falsche Mann dohinner gesat hunn. Et misst en aneren Direkter dohinner kommen. Dat ass dat, wat d'Situatioun kéint retten. No dräi an engem hallwe Joer, wou ech elo net méi do sinn, huet den Här Grün bewisen, datt en dat net kann an e wäert et och an Zukunft net kënnen."

Blannenheem zu Rolleng / Reportage Dany Rasqué (2)

Reaktioun vum aktuellen Direkter

De Generaldirekter aus dem Blannenheem seet, hie wier iwwerrascht gewiescht, iwwert e gudden Deel vun de Reprochen, déi géint hien a géint Institutioun formuléiert goufen.

D'Reproche si "relativ haart", fënnt de Jean-Paul Grün a verschiddener kéint een och einfach widderleeën.

Reaktioun zu Reprochen am Blannenheem / Dany Rasqué

Ee Beispill, dat de Generaldirekter nennt, ass den Hausdokter. Kee Mënsch géif do eppes opgeschwat kréien.

"Éischtens huet all Medezinner d'Recht an en Haus eranzekommen. Zweetens hu mer am Ufank, wéi ech hei war, eng Lëscht ausgeschafft, wou effektiv eng Partie Medezinner drop sinn, déi reegelméisseg hei an d'Haus erakommen, mä wou awer ganz kloer eng Zeil do ass, a wat d'Leit och alleguer gesot kréien, déi bei eis an d'Haus erakommen, fir datt se hiren Hausdokter, respektiv soss iergendeen Hausdokter, kënnen an d'Haus bréngen."

De Jean-Paul Grün dementéiert, datt d'Leit forcéiert ginn, sech ze impfen an et géif a sengem Haus och net just ëm d'Sue goen. De Verwaltungsrot hätt nämlech eng ganz Rei Projeten accordéiert, déi vill Sue géife kaschten an am Intressi vun de Pensionäre wieren.

"Ënnert anerem den Ausbau vun der Kichen, fir datt soubal wéi de Projet fäerdeg do steet, dat d'Leit och Méiglechkeeten hunn, fir aner Saachen z'iessen ze kréien, wéi zum Beispill vegetaresch, respektiv wou mer kënnen oppassen op d'Intolérances alimentaires. Wa mer jo esou op d'Suen aus wieren, wier dat jo sécher net de Fall."

En anere Reproche war dat d'Ambiance am Blannenheem äiseg wier, och do huet de Jean-Paul Grün eng aner Meenung.

"Et ass just schwéier ze verstoen, wéi eng Stëmmung kann äiseg sinn, wann d'Leit net méi kënnen hei an d'Haus erakommen an op där selwechter Linn gëtt da just hannendru gesot, datt d'Personal ganz häerzlech ass. Dat wëllt heeschen, ech denken net, datt d'Stëmmung äiseg heibannen ass. Mir sinn natierlech méi zou, mir mussen eis u Reegelen halen, déi net ëmmer ganz gutt dobaussen ugesinn sinn."

Et géif a Coronazäiten awer net anescht goen.  D'Kris hätt villes méi uerg gemaach. D'Leit géife méi depressiv an empfindlech ginn. Et kéime Reprochen, déi soss net oder net an där Form komm wieren.

Datt eng Awunnerin fir den hallwe Juni aus hirem eegenen Appartement misst eraus, do schwätzt de Generaldirekter vun engem Mëssverständnes

"Ech denken, datt do e Mëssverständnes ass. Mir hunn selbstverständlech en - ech mengen dat kann ee roueg soen- Different mat där Koppel. Do sinn eis Affekoten effektiv ageschalt ginn an déi probéieren, eng Léisung ze fannen. Mä et ass weder gewollt, nach iwwregens méiglech, datt mir iergendeen aus sengem eegenen Appartement géingen erausgeheien an et ass och net virgesinn, datt déi Damm keng Soine méi géing vun eis gemaach kréien."

Wat d'Reprochë vum fréieren Direkter Roger Hoffmann betrëfft, do ënnersträicht de Jean-Paul Grün, datt een ni e perséinleche Problem gehat hätt, seng Arrivée hätt allerdéngs d'Enn vum Roger Hoffmann senger Karriär bedeit an dee wier eben och net am Gudden mam Verwaltungsrot auserneegaangen.

Dee Verwaltungsrot, mam Paul Ensch un der Spëtzt, kënnt iwwregens e Samschdeg zesummen, fir iwwert déi ganz Situatioun ze diskutéieren.

Den Dr. Jean-Paul Grün