Déi Kritik koum vun der Oppositioun, nodeem de Colonel Paul Nilles e Freideg grad de Contraire vun deem sot, wat d'Kommissioun virun 2 Woche erzielt krut.

Militärsatellit / Reportage Pierre Jans

Éier de fréieren Arméisminister Etienne Schneider e Méindeg an d'Budgetskontrollkommissioun wäert goen, fir Positioun zu der Affär ronderëm de Militärsatellit ''Luxeosys'' ze bezéien, souz déi Chamberkommissioun e Freideg mat der fir d'Defense zesummen. Nieft dem haitegen Defenseminister François Bausch war och den Colonel Paul Nilles mat an d'Chamber komm, fir den Deputéierte virun allem technesch Explikatiounen iwwer den Satellit ze ginn. D'Oppositiounsparteien hunn dat och begréisst, si sinn allerdéngs och nees brisant Detailer gewuer ginn, mam Resultat, dass den Dossier net wierklech méi transparent gëtt, esou d'Diane Adehm vun der CSV.

Extrait Diane Adehm

Bis elo krut d'Chamber ëmmer gesot, datt d'Personal vun der Arméi sollt d'Exploitatioun vun deem ganze System maachen. An da sëtzt de fréiere Personalchef vun der Arméi an der Chamber, deen da seet, datt hie mat esou enger Demande net befaasst wier, fir ebe Leit op dës Aarbecht ze preparéieren an ofzestellen. Dann ass et och logesch, datt sech d'Leit an der Kommissioun Froe stellen ze deem, wat si virun 2 Woche vum Här Heck erzielt kruten. Dofir sinn d'Politiker der Meenung, datt hei just nach geflunkert e gelunn gëtt, kritiséiert d'CSV-Politikerin.

De Sven Clement vun de Piraten hat dee selwechte Constat gemaach a vun engem ''staarke Stéck‘‘ geschwat.

"Et goufen nei Indizien iwwer d'Ausbildung vun den Ënneroffizéier, déi den Här Heck deemools an d'Spill bruecht huet. Do huet de fréiere Personalchef vun der Arméi kloer gesot, dass hien do net involvéiert war. Wéi d'Arméi also 50 nei Ënneroffizéier sollt rekrutéieren a forméieren als Satellittenoperateur, an de Personalchef ass net involvéiert... Dat ass staarken Tubak!''

Esouguer bannent de Regierungsparteie ginn et Deputéiert, déi et net kal léisst, ewéi verwurrelt d'Affär aktuell ass.

De Gusty Graas vun der DP zum Beispill: ''Ech soen éierlech: gemëschte Gefiller. Och deemools war ee ganz positiv agestallt vis-à-vis vun deem Projet. Mä haut am Réckbléck huet ee jiddefalls d'Gefill, dass mir Deputéiert deemools net all d'Kaarten op den Dësch geluecht kruten. Dat ass net gutt fir déi parlamentaresch Aarbecht.''

De Mars Di Bartolomeo stellt sech viru säi LSAP-Parteikolleg, den deemolegen Arméisminister Etienne Schneider.

''Ech hunn net dee batteren Nogoût, dass dat bewosst net gemaach ginn ass. Do ware Leit iwwerzeegt, dass dat dee richtege Wee war.''

Dobäi hat awer den deemolegen Arméidirekter Patrick Heck scho Feeler zouginn. Dass de Satellit elo vill méi deier géif ginn, léich dorun, dass déi nei Ekippe ronderëm de Minister François Bausch de Projet ganz nei ausgeriicht hätt. Dee gesäit dat awer anescht.

''Et ass net den Deplacement vun den Antennen, deen esou en héije Käschtepunkt verursaacht. Et sinn eben e ganze Koup aner Saachen, déi am Projet net integréiert waren.''

Den zoustännege Minister François Bausch huet op en neits betount, dass hien de Projet u sech nach ëmmer positiv fënnt. Wéi säi Virgänger Etienne Schneider dat gesäit, an ob hien eventuell Feeler zougëtt, dat gëtt een e Méindeg gewuer.