D'Kommissioun wëll ë.a. wëssen, firwat Govsat, d'Gesellschaft déi de Satellit hätt solle bedreiwen, mëttlerweil net méi um Projet interesséiert ass.

An der Chamber ass de Kalenner vun dëser Woch un nees gutt gefëllt, an e Méindeg de Mëtte stoung an der Budget-Kontrollkommissioun e Projet um Ordre du jour, iwwert dee scho vill gestridde gouf - de Militärsatellit LUXEOSys.

LuxeoSys/Reportage Fanny Kinsch

Dee gëtt nämlech e gutt Stéck méi deier, wéi ugangs geduecht - 309 Milliounen Euro amplaz vun den 170 Milliounen Euro, déi am Projet de loi virgesi waren, deen 2018 just virun de Wale gestëmmt gouf. Am Mäerz dëst Joer hat de gréngen Arméisminister François Bausch, deen de Satellitteprojet vu sengem sozialistesche Virgänger Etienne Schneider geierft huet, en neie Gesetzprojet an d'Chamber bruecht, fir de Budget op 350 Milliounen ze héijen - wouropshin d'Deputéiert an der Budgetskontrollkommissioun Erklärunge gefuerdert hunn.

Zanterdeem krute si en Audit vun der Consulting Firma PwC presentéiert an hunn eng Rei Leit zum Thema gehéiert, dorënner den deemolegen Arméisdirekter Patrick Heck an de fréiere Minister Etienne Schneider. Deemno soll d'Augmentatioun ënnert anerem drop zeréckzeféiere sinn, datt zwou Buedem-Antenne vum Satellit net kënnen um Härebierg installéiert ginn, ma amplaz zu Redu an der Belsch.

67 Milliounen Euro koumen dobäi, well verschidden Elementer, wat d'Maintenance ugeet, net am urspréngleche Gesetzprojet virgesi waren. D’Arméi sollt de Satellit selwer geréieren, hätt awer net déi néideg Kompetenzen, wéi sech erausgestallt hätt. Kuerz virum Summer hat de Minister annoncéiert, datt awer manner Méikäschten dobäi kommen, wéi am Mäerz geduecht, de ganze Budget kënnt deemno nach op 309 amplaz 350 Milliounen Euro.

Ma fir d'Deputéiert, besonnesch vun der Oppositioun, stinn ëmmer nach vill Froen am Raum. D'Presidentin vun der Budgetskontrollkommissioun, d'CSV-Deputéiert Diane Adehm hat no der Entrevue mam Etienne Schneider nach Doutten, ob d'Marché-public-Gesetz respektéiert gouf, wéi déi italienesch Firma OHB-I de Kontrakt fir d'Constructioun vum Satellit krut. Iwwerdeems leeft géint Hitec, eng kleng Lëtzebuergesch Entreprise, déi d'Antenne baue soll, eng Enquête wéinst Abus de biens sociaux, bei där bis ewell 5 Persounen inculpéiert goufen, wéi d'Lëtzebuerger Land Enn August gemellt huet.

D'Budgetskontrollkommissioun wollt och wëssen, firwat Govsat, d'Gesellschaft déi de Satellit hätt solle bedreiwen, mëttlerweil net méi um Projet interesséiert sinn. Déi Responsabel kommen de 25. September an d'Kommissioun.

"Aus alle Wolleke gefall"

Eréischt en halleft Joer nom Vott vum Gesetzprojet fir de Militärsatellit LuxeoSys gouf um Härebierg gekuckt, ob et méiglech wier, de Satellit vun do aus ze bedreiwen. Dat kruten d’Deputéiert aus der Budgetskontrollkommissioun de Méindeg de Mëtteg vum Chef vum Etat Major vun der Arméi Alain Duschène erkläert. No der Kommissioun hunn d'Vertrieder vu sämtleche Parteie sech nawell iwwerrascht gewisen.

D'CSV-Deputéiert a Presidentin vun der Budgetskontrollkommissioun Diane Adehm sot: "Ech muss éierlech soen, mir sinn de Mëtteg aus alle Wolleke gefall, wéi de Generol Duschène bei eis souz, do huet hien eis gesot: Hien ass als Chef d'Etat Major gewuer ginn, dass do verschidde Saache sollen um Härebierg gemaach ginn, wéi hien de Projet de loi gelies huet. An do soe mir, dat dote ka jo awer net sinn, do gëtt 2018 praktesch an enger Hauruck-Aktioun e Projet de loi duerch d'Chamber gebaatscht, e Militärsatellit, deemools 170, 180 Milliounen, an et gëtt gesot, ah dat kënnt alles op den Härebierg an d'Ënneroffizéier um Härebierg, déi exploitéieren dat, an et schwätzt kee mat der Arméi."

D'Diane Adehm

Et hätt sech nämlech och erausgestallt, datt et vill méi laang géif daueren, bis d'Personal mat den néidege Kompetenze bei der Arméi prett wier, wéi bis ewell gesot.

Bis November soll de Gesetzesprojet LUXEOSys an der Chamber gestëmmt gi sinn, fir datt de Lancement vum Satellit wéi geplangt ka geschéien. 2022 soll de LUXEOSys-Satellit an d'Äerdorbit geschoss ginn.