Dat sot de Premier Xavier Bettel e Mëttwoch am fréien Nomëtten an der Chamber no enger Reunioun vun der Institutiounekommissioun.

Et war vill vun Transparenz Rieds e Mëttwoch am fréien Nomëtten an der Chamber, nodeems sech d'Institutiounekommissioun vum Parlament nach emol mat de Konsequenze vum Waringo-Rapport iwwert den Haff befaasst hat.

Waringo-Rapport/Reportage Eric Ewald

De Premier Xavier Bettel huet zum Beispill vun Transparenz, amplaz Kuddelmuddel, och bei de Finanze geschwat an de Sven Clement vun enger erhéichter Transparenz duerch d'Kontroll vum Rechnungshaff a vun der Chamber. Op alle Punkte war ee sech awer net eens.

Beispillsweis net doriwwer, dass de Staatsminister e groussherzoglechen Arrêté iwwert d'Organisatioun vun der Maison grand-ducale virgestallt huet.

"Mir kréien am Fong eng Monarchie, déi vum 19. Joerhonnert an d'21. Joerhonnert kënnt. Et war Zäit. Et ass och am Interêt vun der Institutioun an ech mengen, dass et wierklech hei wichteg war, och zesumme mam Palais déi Reformen auszeschaffen."

De Marc Baum huet et onglécklech fonnt, dass en Arrêté grand-ducal geholl gouf, fir hien hätt missen e Gesetz geschriwwe ginn. Dem Vertrieder vun déi Lénk feelt am Text och eng Definitioun vun den Aufgabe vum Staatschef. Dee wär Demandeur fir Reforme gewiescht an hätt de Wonsch gehat, fir nees Vertrauen ze schafen, sot de Xavier Bettel, deen den Text séier ëmsetze wëll an deenen nächste Wochen.

Der CSV war eng transparent a modern Monarchie wichteg, déi zesumme mam Grand-Duc ze organiséiere war, huet de Léon Gloden erkläert.

"De Premier sot, e misst dat elo fir d'éischt mol nach am Regierungsrot presentéieren. En hat eis hei d'Première ginn, der Chamber, an e sot, e géif kucken, fir dass dat an den nächste Woche publizéiert ka ginn."

Dem CSV-Vertrieder no steet am Text iwwregens näischt iwwer d'Roll vun der Grande-Duchesse.

De Sven Clement huet d'Ausso vum Premier ervirgehuewen, dass de Budget vum Haff "considerabel wäert an d'Luucht goen".

"En huet awer kee Montant genannt. Et muss ee sech elo d'Fro stellen, ëm wéi vill a virun allem sinn dat Suen, déi an der Vergaangenheet op anere Plaze stoungen?"

Fir den Deputéierte vun de Pirate sinn donieft méi Leit am Organigramm virgesinn, an zwar hirer 35, wéi de Marc Baum ënnerstrach huet. Eng Erklärung, wou dee Besoin hierkënnt, hätt een allerdéngs net kritt.

"Mir sinn zu Lëtzebuerg an der Kris a mir musse sécherlech vill Aarbechtsplaze schafen, och ëffentlech Aarbechtsplazen: Do si mir ganz dofir. Ob se elo onbedéngt mussen um Haff geschaaft ginn, wëll ech awer a Fro stellen."

Wat eben eng substanziell Hausse vum Budget no sech zitt, woubäi et awer zu engem Quantesprong par Rapport zur disfonctioneller Verwaltung vu virdrun dierft kommen, huet de Vertrieder vun déi Lénk nach gemengt.