D’Chamber gouf manifestement ugelunn, ma wien um Enn d‘Wourecht gesot huet a wien net, wäert wuel ni ermëttelt ginn.

Et hätt een als Kommissioun wuel festgestallt, dass et am Dossier Militärsatellit eng ganz Rei Widderspréch géif ginn an dass de Projet vun Ufank un net kloer genuch definéiert gewiescht wier, ma eng Enquêtëkommissioun hält den DP-Deputéierten André Bauler, genee wéi seng Kolleege vun de Majoritéitsparteien, awer net fir néideg.

Extrait André Bauler

„Fir d'Majoritéit ass et esou, dass musse Recommandatioune kommen an dass d'Fakte vun Ufank un mussen um Dësch leien, ier esou Projeten, wéi déi hei, kënne votéiert ginn. Dat si jiddefalls déi Conclusiounen, déi mir zesummen haut gezunn hunn.“

Iwwerdeems hätt ee festgehalen, dass den Defenseminister an Zukunft reegelméisseg an d'Budgetskontrollkommissioun soll kommen, fir de Bilan vu lafenden a geplangte Projeten ze maachen.

Bei der Oppositioun stéisst de Refus eng Enquêtëkommissioun anzeberuffen dogéint op grousst Onversteesdemech.

Dem David Wagner vun déi Lénk no, misst een déi vereenzelt Leit, déi kontradiktoresch Aussoen an der Chamberkommissioun gemaach hunn, domat konfrontéieren. Den Deputéierte vun de Majoritéitsparteien no géif dat awer näischt bréngen, well d'Leit dann awer erëm dat selwecht géife soen.

Extrait David Wagner

„Dat ass e Grond méi, fir ze soen, dass een eng Enquêtëkommissioun brauch, well an enger Enquêtëkommissioun muss een ënner Eed aussoen. An eng Enquêtëkommissioun huet u sech och nach aner Pouvoiren, déi vun engem Juge d'instruction fir virzegoen. An do fänkt et un e bësse méi eescht ze ginn, fir déi, déi vläicht eppes falsch interpretéiert hunn an hiren Erklärungen oder esou weider.“

Fir den David Wagner wier mam Refus dës Affär opzeklären och vill Vertrauen an déi dräi Regierungsparteie verluer gaangen.

Dem Adr-Deputeierte Fernand Kartheiser no, geet de Problem awer vill méi wäit.

Extrait Fernand Kartheiser

„Mir als Adr hätte gären, dass d'Institutioune funktionéieren, dat heescht, dass déi Kontrollfunktioun vum Parlament ka wierklech spillen, dass déi wouergeholl gëtt. Dat ass an Oppositioun mat deem Reflex, dee mir elo bei de Regierungsparteie gesinn, fir u sech Lëtzebuerg no Partei-Interessen ze regéieren.“

De Minister, deen de Projet deemools op de Wee bruecht huet, war jo den Etienne Schneider. Ma vue, dass dësen jo net méi Minister ass, kéint hien och keng politesch Responsabilitéit fir dëse Projet mat all senge Problemer méi iwwerhuelen, bedauert iwwerdeems d'CSV-Deputéiert Diane Adehm. Ma och den haitegen Defenseminister, François Bausch, war 2018 an der Regierung an hätt, an den Ae vun der Diane Adehm, schonn deemools missen agräifen.

Ma op engem Punkt si sech Majoritéit an Oppositioun awer eens: Et wier wichteg, aus de Feeler vun der Vergaangenheet ze léieren an dës an Zukunft z'evitéieren.