Dat hu si op enger Pressekonferenz op en Neits wësse gedoen. Déi entspriechend Resolutioun géif en Donneschdeg an der Chamber deposéiert ginn.

Beim Thema Militärsatellit kéint een net méi nëmme vun engem Dossier schwätzen, ma et wier eng richteg Affär, esou d'CSV-Deputéiert Diane Adehm. De Projet, deen ursprénglech 170 Milliounen Euro sollt kaschten, soll jo elo 139 Milliounen Euro méi deier ginn. Firwat dat esou ass, hätt een an der Budgetskontrollkommissioun wëllen erausfannen, esou d'Diane Adehm, ma do wier ee mat enger ganzer Rei Ongereimtheeten a Kontradiktioune konfrontéiert gewiescht, esou dass een déi Fro bis haut net kéint beäntweren.

An där Kommissioun haten d'Deputéiert vun den Oppositiounsparteie scho gefrot, dass eng Enquêtëkommissioun sollt aberuff ginn, fir dat ze klären, ma dat hunn d'Deputéiert vun de Majoritéitsparteien dee Moment refuséiert. Elo start d'Oppositioun en zweete Versuch, andeems d'CSV, déi Lénk, d'adr an d'Piratepartei en Donneschdeg zesummen eng Resolutioun an der Chamber deposéiert hunn, fir eben esou eng Enquêtëkommissioun op d'Been ze stellen. Ëmmerhi missten déi Leit, déi zwar schonn an der Budgetskontrollkommissioun gehéiert gi waren, dee Moment ënner Eed aussoen an dovu versprécht ee sech da méi koherent Aussoen, wéi den Deputéierte vun déi Lénk, David Wagner, erkläert.

„Ech si relativ erschreckt iwwert d'Verständnis vun der Majoritéit, wat de Rôle vun der Chamber soll sinn. Ech menge si huelen deen net ganz eescht. Op jiddwer Fall hu si muer d'Méiglechkeet an der Chamber z'akzeptéieren, dass eng Enquêtëkommissioun gemaach gëtt, da beweise se fir d'éischt emol, dass si kee Wëllen hunn eppes ze vertuschen an dass se bereet sinn der Chamber dee Rôle ze ginn, dee si och verdéngt.“

Extrait David Wagner



D'Oppositioun huet dann och annoncéiert, dass een en Donneschdeg den erweiderte Budget vun 139 Milliounen Euro fir de Militärsatellit net wéilt matstëmmen.

Bei der Pressekonferenz e Mëttwoch de Moien gouf dann nach eng Kéier opgezielt, wat alles am urspréngleche Budget vergiess gouf a woufir de d'Steierzueler elo soll 139 Milliounen Euro méi berappen.

Dozou gehéieren zum Beispill: De sougenannte Missioun Operating Center, dee vu LuxGovSat sollt iwwerholl ginn, fir 25 Milliounen Euro. Den Datenzenter a säin Ënnerhalt fir 14,6 Milliounen Euro. D'Maintenance vum System fir 10 Milliounen Euro. D'Locatioun vun enger Antenn a Schweden fir 10 Milliounen Euro. De Fait, dass d'Antennen elo an d'Belsch solle kommen an net wéi uganks geplangt op Dikrech kascht zousätzlech 2,4 Milliounen. Derbäi kéimen och nach eng Kéier 38 Milliounen Euro, fir alles dat, wat déi Lëtzebuerger Arméi méi muss leeschten fir dëse Projet.

D'Oppositioun monéiert dann och, dass et guer keng richteg Ausschreiwunge fir de Projet ginn hätt. D'Affekotin aus dem Defense-Ministère hätt an der Budgetskontrollkommissioun esouguer gesot, dass een am Ministère seng Gewunnechte gehat hätt an obschonn et en entspriechend Gesetz gouf, hätt een awer einfach weider gemaach wéi virdrun, eben ouni Ausschreiwungen.

Kritik gouf et dann och, well quasi all déi néideg Infrastrukturen um Buedem, fir de Satellit z'exploitéieren, schlecht geplangt an am Budget vergiess gi wieren.

Ausserdeem gouf ervirgehuewen, dass d'Arméi eréischt vill ze spéit an de Projet agebonne gouf, obschonn si awer hei eng grouss Roll soll spillen. Zum Beispill wier de Rekrutement vun deem néidege Personal fir dës nei Aufgaben, wier ni virgesi gewiescht. D'Chamber hätt dann och gefrot fir e Personal-Opbau-Konzept vun der Arméi ze kréien, ma dat géif et bis ewell net ginn. Dowéinst géif dann elo mol en Deel vun den Aufgaben, déi d'Arméi sollt iwwerhuelen, un déi Belsch Arméi ausgelagert ginn.