Insgesamt goufen 41 Awunner a 40 Mataarbechter vum Altersheem "Ste Elisabeth am Park" positiv getest, 8 Awunner sinn un der Infektioun gestuerwen.

Zanter Mëtt Januar gëtt et an engem Altersheem an der Stad e gréissere Corona-Ausbroch. Am Ste Elisabeth am Park schaffen eng ronn 120 Mataarbechter an et liewen eng 110 Awunner do am Altersheem. Bis Mëtt Januar hätt et nach net ee positive Fall ginn, esou d'Fabienne Steffen, Generaldirektesch vun Elisabeth. Bannent kuerzer Zäit hu sech elo 41 Awunner a 40 Mataarbechter infizéiert a si positiv op de Coronavirus getest ginn, 8 Persoune si bis ewell gestuerwen.

Wéi de Virus trotz reegelméissegen Tester, ënnert dem Personal an Awunner, esou staark konnt zirkuléieren, wier den Ament schwiereg ze soen. Am Raum hätt och gestanen, datt et sech géing ëm déi brittesch Variant handelen, dëst wier awer den Ament nach net gewosst. An der Struktur géif een, esou gutt et geet, versichen, déi Infizéiert vun de Net-Infizéierten ze trennen. Wéinst Personalmangel gouf och op d'Reserve sanitaire zeréckgegraff. Vun de knapp 110 Awunner gouf bis ewell och nach kee geimpft.

Corinne Cahen: Situatioun ënner Kontroll

D'Familljeministesch Corinne Cahen sot RTL géintiwwer, datt déi éischt zwee Fäll op den 12. Januar zréckginn. Den Ament gëtt et nach 25 aktiv Fäll bei de Bewunner, 6 Persoune sinn hospitaliséiert. De gréissten Deel vun de positiv getesten Awunner wier réischt opgefall, wei déi ganz Bewunner duerchgetest goufen. A 25 Fäll wier et eng asymptomatesch Infektioun gewiescht. Der Familljeministesch no hätt een d'Situatioun ënner Kontroll. Wéi et genee zu dësem Ausbroch konnt kommen, kéint een nach net soen. De Staatslabo hätt d'Prouwe sequenzéiert. Weder dem Familljeministère nach der Santé géife Resultater virleien.