En Donneschdeg de Moien huet sech de Verwaltungsrot vun den Hôpitaux Robert Schuman ëm de President Jean-Louis Schiltz op enger Pressekonferenz erkläert.

"Mir hunn eis net virgedréckt" - esou reagéiert de President vum Verwaltungsrot vun den Hôpitaux Robert Schuman, de Jean-Louis Schiltz, op déi rezent Reproche géint hien an déi 2 Vizepresidente vum Verwaltungsrot. Déi 3 waren an d'Kritik geroden, well si sech direkt am Januar impfe gelooss hunn, obwuel dat vun der Santé net sou geduecht war. De Jean-Louis Schiltz ass sech kenger Schold bewosst a verbitt sech, wéi e selwer sot, sech Lektiounen an Anstand a Moral ginn ze loossen.

De Jean-Louis Schiltz léisst de Reproche net gëllen, et hätt ee sech virgedréckt an et hätt een d'Richtlinne vun der Santé net agehalen. Si wiere quasi déi Lescht am Spidol gewiescht, déi geimpft goufen.

"Wann ech Iech soen, datt d'Presidence an eisen Aen zu der Secourisatioun vum Spidol gehéiert, dann ass et dem Gesetz no sou, datt et de Conseil d'administration ass, deen d'Gesellschaft representéiert. Et ass e Prinzip vum Gesellschaftsrecht, deen et säit 200 Joer gëtt. De Conseil d'administration ass domat d'Haaptorgan vum Spidol."

De Jean-Louis Schiltz sot iwwerdeems, am Januar wier d'Skepsis géigeniwwer der Impfung beim Personal nach méi grouss gewiescht. Si 3 hätte sech och verséchert, datt keen anere kéint drukommen, iert si sech impfe gelooss hätten, sou de President vum Verwaltungsrot vun den Hôpitaux Robert Schuman.

De President vum HRS-Verwaltungsrot steet deemno zu der Decisioun vum Spidolsgrupp, hie selwer, de Claude Seywert an de Michel Wurth z'impfen.

"Mir kréie vill Ënnerstëtzung. Ech kréie Maile vu Patienten, déi bei eis sinn, waren, déi ech net kennen oder vun deenen ech net wosst, dat se Patient bei eis sinn. Ech wollt ofschléissend 2 Saache soen. Ech verbidde mer et, fir mer Lektiounen an Anstand a Moral ginn ze loosse vu Leit. Ech hu guer näischt dogéint, wann ee jonk, quirreleg, energesch ass. Ech war dat och eng Kéier. Mee ech mengen, da soll een awer net deenen anere Leit Moral an Anstand virhalen."

Et wier jidderengem säi gutt Recht, der Meenung ze sinn, hir Decisioun wier onglécklech gewiescht, nach bleift et hiert Recht, sech z'erklären, sou de Verwaltungsrotspresident Jean-Louis Schiltz.

Mir wollten eng Institutioun securiséiere mat den Impfungen. Zu deem "Bouclier sanitaire" géif och d'Presidence vun engem Spidol gehéieren. Wa vun Ufank un d'Richtlinn gewiescht wier, just déi Leit ze impfen, déi am direkte Kontakt mam Patient wieren, dann hätten alleguerten d'Spideeler zu Lëtzebuerg eppes falsch gemaach. Hie géif d'Spidol engem Risiko aussetzen, wann hien als net geimpfte Persoun géif ran a rausgoen. Et wier een als Verwaltungsréit och penal responsabel fir dat, wat am Spidol geschitt.

Et kéint een net maachen, wéi wann näischt wier, wa bis Vaccinen do wieren. Duerfir hätt een d'Solution de précaution gewielt.

De fréieren CSV-Minister huet och mam Fanger op d'FHL gewisen an der Spidolsfederatioun hir Kommunikatioun mam Spidol kritiséiert.

Hei déi komplett Pressekonferenz am Replay:

Affär Hôpitaux Robert Schuman
Hei de komplette Replay vun der Pressekonferenz.