Am Altersheem "Um Lauterbann" zu Nidderkuer gëtt et e Corona-Cluster. War Ufanks vun 20 Covid-19-Positive Rieds, läit d'Zuel awer däitlech méi héich.

Iwwert déi leschten Deeg hätte sech sëllege Clienten an de Gebailechkeete mam Virus infizéiert. 63 Residentë si bis ewell Covid-19-positiv getest ginn, dozou komme 25 Persoune vum Personal. 5 Leit hätten d'Infektioun bis ewell net iwwerlieft, confirméiert d'Kommunikatioun vu Servior.

Dem Gros vun de Concernéierte géif et gutt goen, déi meescht wieren asymptomatesch. 12 Clienten hätte Symptomer, 3 dovunner méi schwéierer. Déi verstuerwe Persounen hätte schwéier Virerkrankunge gehat, 3 vun hinne sinn de leschte Weekend gestuerwen.

Eng éischt Patientin wier de 17. Februar positiv getest ginn. 2 Deeg drop wier sëllege Residenten iwwert en interne Large-Scale-Test am Haus och positiv getest ginn. Do waren et der 20, haut wier een op 63 Residenten. Dëst wier awer näischt Exzeptionelles, esou Clusteren hätten een am Passé a méi Haiser detektéiert, esou Servior.

Nathalie Hanck: „Heiansdo schwätz ee vun Zuelen, mä et soll een haaptsächlech kucken, wéi d'Leit sech spieren. An deem Fall geet et dem gréissten Deel vun de Leit gutt. Se sinn elo natierlech fir den Ament confinéiert, well mer elo d'Visitte gestoppt hunn.“

D'Nathalie Hanck vu Servior

Déi Infizéiert goufen isoléiert. Visitte si wéi gesot den Ament keng erlaabt, virtuell Kontakter sinn awer méiglech.

Wou sech infizéiert gouf, wier net gewosst. Et géif awer net ausgeschloss ginn, datt de Virus vum Besuch erabruecht gouf.

Nathalie Hanck: „E bësse méi exzeptionell ass, datt effektiv elo déi Leit positiv getest ginn, 2 Deeg nodeems si déi éischt Dosis Vaccin krut hunn. Et muss ee soen, datt den Cipa zu Nidderkuer ee vun der leschten Haiser ass, dat an der Impfcampagne matmécht.“

D'Nathalie Hanck vu Servior

Dat Ganzt wier keng aussergewéinlech Situatioun, sou heescht et vum Bedreiwer Servior. Speziell wier just, datt d'Infektioune kuerz no der éischter Impfung Mëtt Februar opgetruede sinn. Dass de Cipa Nidderkuer um Schluss vun der Impfcampagne ass, do géif ee regrettéieren, datt den Impfagenda et net zougelooss hätt, éischter mam Impfen unzefänken, esou Servior.

Dëst wier awer keng Remise en cause, wat déi 2. Impfdosis fir d'Bewunner zu Nidderkuer ugeet. Et wier bis ewell geplangt, Mëtt Mäerz mam Impfe weiderzefueren.

Effektiv beweise Studien, datt de volle Schutz vum Impfstoff dacks eréischt no e puer Deeg respektiv e puer Wochen erreecht gëtt.