E weidere Liichtbléck sinn déi geplangte Liwwerunge vu Vaccinen. Et gi sech Dosisse fir iwwer 73.000 Awunner am Abrëll erwaart.

Briefing nom Regierungsrot / Reportage Pit Everling

D'Covid-Situatioun am Land ass stabel an awer gëllt et net, un der Virsiicht an den Efforten nozeloossen, och wann et nees Zukunftsperspektive ginn.

Am Ministerrot gouf e Freideg decidéiert, dass déi aktuell Restriktiounen a Limitatioune bis den 2. Abrëll verlängert ginn. "Ënner Konditiounen" kéinten awer vum Ouschterweekend u méi 'souple' Mesurë gëllen, zum Beispill fir den Horeca-Secteur. Alles géif awer vun den Zuelen ofhänken. En "normaalt Opgoen" géif et awer sécher nach net ginn, sou de Staatsminister.

Xavier Bettel - Marathon

Och am sportlechen a kulturelle Beräich kéinten am Abrëll méi labber Mesurë gëllen.

D'Impf-Campagne geet jee no Liwwerunge vun den 3 verschiddene Vaccine weider. Eleng fir den Abrëll ginn Dosisse fir iwwer 73.000 Leit erwaart. Nächste Mount solle 95.940 Dosisse vu Biontech/Pfizer, 42.530 vun AstraZeneca an 8.400 vu Moderna zu Lëtzebuerg ukommen.

Aktuell ass d'Phas 2 vun der Campagne am Gaang. Hei ass et wichteg, datt et e Freideg gréng Luucht vun der Regierung gouf, fir den AstraZeneca-Vaccin fir Leit iwwer 65 Joer zouzeloossen - deemno gi lo weider 11.000 Invitatiounen eraus. Bis ewell hu bal 7.000 eeler Leit hire Rendez-vous fir eng Vaccinatioun an engem vun den Zentere geholl. Vun de bal 36.000 Vaccinen, déi geliwwert goufen, kruten 13.400 Leit hire Rappell. Et bleift nach e Stock vun 3.800 Vaccinen. 86% vun den eelere Leit, déi a CIPAe logéiert sinn, goufen effektiv och geimpft, dës Campagne ass dann och an zwou Wochen ofgeschloss.

Och d'Gesondheetsministesch sot nom Ministerrot, datt et aktuell keng exponentiell Haussen am Land géife ginn, de Reproduktiounstaux wier nees ënnert 1% gefall, och wann d'Neiinfektiounen ëm 6% geklomme wieren. D'brittesch Variant mécht iwwerdeems weider iwwer 55% vun allen Neiinfektiounen aus. D'Paulette Lenert schléisst dann och virsiichteg Ouverturen net méi aus. Wat d'Schnelltester ugeet, sou kommen dës bei de Large-Scale-Testing dobäi a kommen zum Beispill lo verstäerkt an de Schoulen an den Asaz. E Piloteprojet mat neie Spauttester fänkt och fir Visiteuren an Alters- a Fleegeheemer un.

Xavier Bettel iwwer Spauttest

Och d'Apdikte solle méi an den Asaz kommen, wat d'Tester ugeet, PCR- a Schnelltester, mee et missten nach praktesch Froe gekläert ginn. Am Abrëll kéint et och sinn, datt an Doktesch-Cabinete vaccinéiert gëtt an datt d'Impf-Zenteren och sonndes op hätten.

Paulette Lenert iwwer weider Etappen

D'Pressekonferenz am Replay