Bei dëser Dot war de Bouf (2 Joer) vum Mann ëmkomm, 4 weider Persoune goufen deels schwéier verwonnt. E Familljesträit soll de Grond gewiescht sinn.

Um Méindeg war zu Dikrech um Geriicht Optakt vum Prozess. Den 2. Januar 2019 war de klenge Calvin am Alter vun nëmmen 2 Joer ëm d‘Liewe komm. Säin eegene Papp war zu Wolz an der Rue Grand- Duchesse Charlotte mat sengem bloe Citroën C4 an e Grupp vu 5 Leit um Trottoir gefuer. Verletzt goufe seng Ex-Frëndin, deen Ament 42 Joer, eng Frëndin vun hier vu 24 Joer, an där hiert Kand vun 10 Méint liicht . Der Ex-Frëndin hire Partner vu 47 Joer koum mat liewensgeféierleche Blessuren an d'Klinik.

De Beschëllegten ass zanter dem tragesche Virfall wéinst Mord an Doudschlag, souwéi versichte Mord a versichten Doudschlag an Untersuchungshaft. Elo goufen eng Rei Experten zum Fall gehéiert, dorënner ënner anerem Psychologen, Geriichtsmedeziner an och de verkéierstechnesche Rapport gouf presentéiert.

Den Experte géigeniwwer huet de Beschëllegten ausgesot, hien hätt de Grupp beim Laanschtfuere gesinn. Hien hätt sech immens gefreet, seng Ex-Frëndin erbléckt ze hunn an huet doropshin d’Kéier gemaach, well e mat hier schwätze wollt. Zu deem Ament wier hien iwwerzeegt gewiescht, si wéilt, trotz neier Bezéiung, bei hien zeréckkommen. Wéi et dunn awer zu deem tragesche Virfall komm ass, dorunner kéint hie sech net erënneren. Direkt nom Accident wier hien awer bei säi Bouf gaangen, fir deem éischt Hëllef ze leeschten.

Deen Aussetzer, deen hien hat, erkläert hie sech duerch eng Ënnerzockerung wéinst sengem Diabetis Typ2. Hie wier dowéinst wuel een Ablack vu sech gewiescht. Dass dat de Fall war, hunn d’Experten awer ausgeschloss, well de Mann dann net direkt nom Accident erëm zou sech komm wier, fir ze reagéieren.

An engem verkéierstechnesche Rapport hat den Expert da festgehalen, dat de Won vum Beschëllegten de Grupp wuel mat enger Vitess tëscht 40 an 60 Km/h erfaasst huet. Brems- oder Beschleunegungsspuren waren awer keng op der Strooss. Allerdéngs, sou den Expert, muss den Ugekloten nom Accident op d’Brems getrëppelt sinn, well säi Won no gutt 20 Meter stoung.

Relativ séier no der Dot war d’Police vun enger Bezéiungsdot ausgaangen, ma och eng Psychologin wëll dëst net ausschléissen. Den Ugekloten hat senger Ex-Frëndin nach no der Trennung Messagë geschéckt an och e Verlobungsrank an d’Boîte gemaach. Hien hätt wuel Schwieregkeete mat der Trennung ëmzegoen a kéint Stress net gutt bewältegen, heescht et vun den Experten. Dobäi hätt hien awer ëmmer nëmme vun engem physesche Leide geschwat als Ursaach vum Virfall a wier seelen emotional gewiescht.

Esou war den Ugekloten dann och beim Prozess ze gesinn. No baussen hin huet hie relativ wéineg Emotioune gewisen, wärend hien den Detailer vum Virfall nogelauschtert huet.

De Prozess geet en Donneschdeg- a Freidegmuere weider.