D’Regierung zitt d’Schrauf bei den Anti-Covid-Mesuren un.

Kuerz no 17 Auer e Méindeg de Mëtteg hunn de Premier an d'Gesondheetsministesch iwwert d'Aarbechten aus dem Regierungsrot  informéiert. De Staatsminister Xavier Bettel sot, dass ee leider nach ze wéineg iwwer déi nei südafrikanesch Omikron-Variant géing wëssen, mä et misst ee virsiichteg bleiwen, well net just am Ausland géingen d'Zuelen an d'Luucht goen.

Am Grand-Duché goufen et déi lescht Woch am Schnëtt 80 Infektiounen den Dag méi, wéi nach déi Woch virdrunner. Den Ament léichen iwwerdeems iwwer 60 Patienten an de Spideeler, virun engem Mount wieren et der nach 37 gewiescht. Déi meescht Infektioune si bei de Jonke vun ënner 12 Joer, also bei Persounen, déi net geimpft sinn. An dofir war et weiderhin den Appell, sech impfen ze loossen, mä et missten och nei Restriktiounen agefouert ginn. Et wéilt ee mat alle Moyenen een nächste Lockdown verhënneren, sou de Xavier Bettel.

F&A iwwer nei Covid-Mesuren / Reportage Roy Grotz

3G op der Aarbechtsplaz

Op der Aarbechtsplaz soll am Laf vum Januar den 3G agefouert ginn. Dat heescht also, datt ee muss geheelt oder geimpft sinn oder awer muss en zertifiéierten Test presentéieren. Den 3G gëllt op all den Aarbechtsplazen, och fir Leit, déi am Horeca schaffen, wou da fir d'Gäscht den 2G gëllt.

2G am Fräizäitberäich

Am rekreativen Domaine, also der Fräizäit an den Hobbyen, gëtt den 2G-Modus agefouert. Dat soll schonn d'nächst Woch de Fall sinn. Dorënner falen d'Restauranten, d'Caféen, d'Kinoen, d'Diskoen, d'Kultur, de Sport an all aner Aktivitéiten, déi am Fong net zum Beruff gehéieren. Den 2G gëllt souwuel fir Aktivitéiten, déi banne stattfannen, wéi déi déi bausse stattfannen. Chrëschtmäert an Terrasse sinn also elo net op fir Net-Geimpften.

Bis op Weideres solle weder Schoulen nach Restauranten zougemaach ginn. Et géif awer esou vill Inconnue ginn, dass een Näischt ausschléisse kéint, sou de Xavier Bettel nach op der Pressekonferenz.

Ännerungen am Sport

Wann dat neit Covid-Gesetz bis a Kraaft trëtt, wäerten et am Sport och eng Rei Ännerungen ginn. Bei de Sportler vun 19 Joer u gëllt dann den 2G, dat heescht et muss ee geimpft oder nees gesond sinn.

Bei Profisportler gëllt den 3G, dat heescht do zielt dann och nach en zertifiéierte Schnelltest oder PCR-Test. Et muss allerdéngs ee gültegen Aarbechtskontrakt bestoen, deen virun engem gewëssenen Datum ofgeschloss gouf. De Sportminister Dan Kersch geet dovun aus, datt dat neit Gesetz an aacht bis zéng Deeg a Kraaft misst trieden.

Bei de jonke Sportler tëscht 12 an 18 Joer inclus gëllt och den 3G. Bei de Kanner vun 0 bis 12 Joer ännert näischt am Verglach zu elo, dat heescht do ginn et keng Restriktiounen.

Identitéitskontrolle kommen

An Zukunft kënnen Identitéitskontrollen, ouni datt d'Police op der Plaz ass, gemaach ginn. Beispillsweis ass e Restaurateur mat responsabel, wann hie Clienteë mat engem falsche QR-Code eraléisst. Persounen, déi den 2G net erfëllen, dierfen net eragelooss ginn.

An der CovidCheck-App kommen dofir nei Menüen "Loisir" an "Aarbecht".

Net méi spéit wéi en Dënschdeg de Moien kënnt d'Regierung mat de Sozialpartner beieneen - de Vott vun den neien 2G- an 3G-Dispositioune soll ewell d'nächst Woch um Krautmaart sinn an da gëllen déi nei Dispositioune well virum 18. Dezember.

AstraZeneca-Impfung: Booster no 4 Méint

Donieft war et op der Pressekonferenz och nach d'Info, datt Leit, déi eng duebel AstraZeneca-Impfung kritt hunn, schonn no 4 Méint eng Booster-Impfung kënne kréien. Si kënne sech déi direkt maache loossen a mussen net op eng Invitatioun vun der Santé waarden. D'Gesondheetsministesch an de Premier hu präziséiert, datt Leit, déi eng Kräizimpfung kruten, net vun dëser Mesure betraff sinn.

Gültegkeet vu PCR- a Schnelltester geet erof

Dës Woch nach wäert d'Gültegkeet vu PCR-Tester vun 72 op 48 Stonnen erofgoen. Bei de Schnelltester geet d'Gültegkeet vun 48 op 24 Stonnen erof.

Punkt fir Punkt iwwert déi nei Covid-Mesuren
En Dënschdeg hunn de Premier an d'Gesondheetsminister nei Mesuren an der Lutte géint d'Corona-Pandemie ugekënnegt.

De Replay vun der Pressekonferenz