De Guy W. Stoos ass dout. De bekannte Graphiker a Karikaturist ass an der Nuecht op e Mëttwoch am Alter vun 71 Joer verscheet.

Nieft Affichen a Buch-Illustratiounen huet de Guy Stoos och nach all Woch pointéiert Karikature fir d'Woxx, de GréngeSpoun, realiséiert, dat vun der 1. Nummer am Oktober 1988 bis d'Chrëschtdagseditioun 2021. Besonnesch bekannt waren och seng bësseg Karikaturen am Feierkrop - de Guy Stoos huet dës satiresch Wochen-Publikatioun, déi bis 2018 eraus koum, matgegrënnt a war e feste Mataarbechter. De Guy Stoos war gebiertegen Ettelbrécker an huet sech fir Déi Lénk engagéiert - fir dës Partei war hien och tëscht 2003 bis 2006 am Stater Gemengerot. Zanter 15 Joer war de Guy Stoos, deen och als Informatiker geschafft huet, an der Pensioun.

Seng Karikature koumen ënner anerem och an dräi Bicher an den Ultimomondo-Editiounen eraus. Wärend laange Jore konnt een dem Guy Stoos seng Karikaturen am Feierkrop gesinn. Karikaturen si jo déi bildlech Form vun der Satir, deemno eng Method fir Mënschen oder Situatiounen iwwerspëtzt duerzestellen an domadder gesellschaftlech oder politesch Zoustänn ze kritiséieren oder ze interpretéieren.

De Guy Stoos huet sech a senge Wierker vrun allem mat sozialen Theme beschäftegt. Mat senge schwaarz-wäisse spatze Konture stellt hien d'Politiker knapps mä prägnant duer. Themen, déi hien iwwer 40 Joer ëmmer erëm ugepaakt huet, sinn dacks iwwer d'Zäit eraus aktuell bliwwen: Logement, Integratioun, Ongerechtegkeeten, politesch Skandaler, Walrecht fir Net-Lëtzebuerger, Flüchtlingskris.

Ëm déi Themen ass et ënnert anerem och a sengem Buch gaangen, an deem hien am Joer 2019 d'Geschicht vun der ASTI retracéiert huet. De Guy Stoos um RTL-Mikro virun zwee Joer:

De Guy Stoos um RTL-Mikro

Datt Kritik a Satir net ëmmer iwwerall gutt opgeholl ginn an esouguer geféierlech kënne ginn, weess ee spéitstens zënter de Mohammed-Karikaturen an nach méi präzis zënter den Attentater 2015 op d'Redaktioun vun Charlie Hebdo.

D'Analyse 2019 vun der Presse-Seene vum Guy Stoos:

De Guy Stoos iwwer d'Presselandschaft zu Lëtzebuerg
De Guy Stoos virun zwee Joer zum 40. Anniversaire vun der Asti
Viru 40 Joer gouf d’Asti gegrënnt, eng Associatioun, déi ënnert anerem d’Refugiéen ënnerstëtzt a se probéiert hei am Land nach besser ze integréieren.
Portrait Guy Stoos
2001 haten d'Kolleege vun der Tëlee e Portrait iwwert de Karikaturist gemaach.

Reaktioun vun déi Lénk Stad

Merci, Guy !

déi Lénk Stad bedauert zudéifst dee vill ze fréien Doud vun hirem Member a fréiere Vertrieder am Gemengerot vun der Stad Lëtzebuerg, dem Guy W. Stoos.
Mat senge bëssege Karikaturen huet de Guy déi flagrant Mëssstänn an eiser Gesellschaft portraitéiert, géint d’Dommheet, d’Ausbeutung an d’Diskriminéierung gekämpft an deene Mächtegen de Spigel virun d’Nues gehalen.  Sengem enormen Talent stoung dem Guy seng Bescheidenheet géintiwwer.
Guy, mir soen der Merci – du bleifs eis ëmmer an Erënnerung als en immens léiwen an humorvolle Mënsch a Komerod !

 

Mir soen dem Guy senger Famill eis déift Bäileed!

 

Lëtzebuerg, den 12. Januar 2022