Esou den CNS-President am Interview am Kontext vun der Aféierung vum 3G op der Aarbecht, an der méiglecher Hausse vu Krankeschäiner duerch déi nei Mesure.

Vun e Samschdeg u gëllt jo den 3G op der Aarbecht - geimpft, geheelt oder getest muss een also sinn, fir kënne schaffen ze goen. Dat neit Gesetz hätt kee weideren Impakt op d'Aarbecht vun der Gesondheetskeess, dat sot de President vun der CNS de Christian Oberlé am RTL-Interview. An awer wier ee preparéiert.

CNS - Contrôle médical / E Reportage vum Claudia Kollwelter

D'CNS deelt d'Suerg vum Patronat an de Gewerkschaften, datt eventuell méi Krankeschäiner ugefrot ginn an dofir géif ee sech och am Fall wou d'Situatioun et verlaangt déi néideg Moyene ginn, erkläert de Christian Oberlé. Christian Oberlé: Et ass ganz sécher net, datt mer e systematesche Kontroll era bréngen. Dat ass ausgeschloss. Mir wëllen net krank Leit systematesch an e Kontroll schécken, nëmme well jo kéint eventuell eng Motivatioun vun 3G hannendru sinn. An och d'Majoritéit vun de Patrone geréiert dat ganz seriö an d'Doktere ginn an der Majoritéit seriö mat Krankeschäiner ëm.

Et géif een awer natierlech Anomalitéiten nogoen, wann et därer géife ginn.

Christian Oberlé: Et gi Statistike gemaach, mir kucken d'Comportementer vun den Assuréeën, de Patronen an Dokteren. Dat kënne mer statistesch novollzéien. A wat wichteg ass, datt wann e Fall signaléiert gëtt, da gi mer eis Moyene fir de Suivi ze maachen. Dat ass eis Flicht, mä et gi keng systematesch Kontrolle gemaach.

De Fall gesat, datt méi Aarbecht ufält wier ee preparéiert, seet de President vun der Gesondheetskeess.

Christian Oberlé: Éischt Léisung ass dann Agente vun anere Beräicher ofzitt an do asëtzt, wat natierlech mat sech bréngt, datt aner Aarbechtsfelder méi leie bleiwen a mer do Retarde kréien, zum Beispill mat de Remboursementer. Wat mer versichen opzefänken andeem mer mat Interime schaffen.

D'Motivatioun vun de Leit fir sech krank schreiwen ze loossen, géif bei der CNS keng Roll spillen, et géif just drëm goen ob deen, dee vun der Gesondheetskeess en Charge geholl gëtt wierklech krank wier oder net huet de Christian Oberlé nach betount.