D'DP an déi Gréng si fir eng Impfflicht, wéi se vun engem Expertegrupp proposéiert gouf, d'LSAP wëll hir Positioun en Dënschdeg nach net verroden.

Debatt Impfflicht an der Chamber / Fanny Kinsch

An de Gesondheets- a Justizkommissioune vun der Chamber gouf en Dënschdeg d'Debatt zum Thema preparéiert, déi e Mëttwoch an der Chamber ass. D'Deputéierte konnten den Experten och hir Froe stellen.Den Expertegrupp proposéiert eng Impfflicht fir Leit iwwer 50 a fir Leit, déi am Gesondheets- a Fleegesecteur schaffen.

DP fir eng allgemeng Impfflicht, et kéint een awer och op de Wee vun den Experte goen

D'DP hat sech bis ewell fir eng allgemeng Impfflicht ausgeschwat. No den Explikatioune vun den Experte wier een awer och prett, mat op dee Wee ze goen, sou de Fraktiounschef Gilles Baum.

De Gilles Baum vun der DP

"Mir als Demokratesch Partei kéinte mat de Propositiounen, déi vum Experterot gemaach gi sinn, averstane sinn, dat heescht mat op de Wee goen, fir eng sektoriell Impfflicht an och eng Impfflicht ab 50. Well mer wéi gesot eng ganz Rei Erklärungen de Moien nach kruten, datt effektiv ab 50 de Risiko fir wierklech schwéier krank ze ginn, de Risiko fir am Spidol ze leien an och de Risiko fir drun ze stierwen, awer 98% vun de Leit hunn iwwer 50 Joer gehat, déi um Covid hei zu Lëtzebuerg gestuerwe sinn. Mir hunn eng ganz Rei wichteg Informatioune kritt an dat géif eis beweegen, an déi Richtung fir ze soen, mir kéinte mat deene Propositiounen, déi vum Expertegrupp gemaach gi sinn, averstane sinn."

Déi Gréng gesinn et änlech, wéi d'DP

Och déi Gréng hate sech no enger parteiinterner Debatt fir eng allgemeng Impfflicht ausgeschwat. Den Deputéierte Marc Hansen schéngt awer och mat enger sektorieller an altersgebonnener Impfflicht d'Accord ze sinn.

De Marc Hansen vun déi Gréng

"Den Experterot ass jo elo een Avis, dee mer hunn, mat deem mer muer [Mëttwoch] dann och an d'Debatt wäerte goen. Den Experterot seet eben ab 50, si hunn dat och nach eng Kéier erkläert, well wann een do e Stréch géing drënner zéien, sinn dat u sech déi Leit, déi am meeschten an de Spideeler landen, an den Intensivstatioune landen. An natierlech deen anere Volet, eng sektoriell Impfflicht, ebe fir och déi Vulnerabel ze schützen, well dat déi Leit sinn, déi am meeschten am Kontakt mat hinne sinn. Mir kënnen natierlech domadder ganz gutt liewen. Mir sinn der Meenung, datt eng Impfflicht soll kommen an dass dat do e Schrëtt an déi richteg Richtung ass a mir sinn och iwwerzeegt, dass dat do eng grouss Effikassitéit wäert hunn."

De Marc Hansen vun Déi Gréng (2)

"Ech mengen, dass een dat, wat si proposéiert hunn, séier soll ëmsetzen, fir dass ee prett ass fir nächste Wanter. Dat huet héchstwarscheinlech keen Impakt méi op d'Omikron-Well, well deen Text, dee muss jo och nach fäerdeg ficeléiert ginn, dee muss duerch d'Chamber goen, ob deen elo nach en Impakt huet op Omikron oder net, weess ech net. Kommunikativ ganz sécher, wann eng Impfflicht decidéiert gëtt, si sécherlech scho Leit, déi dorop reagéieren a sech trotzdeem dann och wäerten impfe loossen. Also wäert et och mat enger éischter Impfung huet ee schonn eng liicht Effikassitéit, vun dohier ass dat net onwichteg."

Souwuel de Gilles Baum wéi och de Marc Hansen hu sech dofir ausgeschwat, datt elo séier soll en Impfflicht-Gesetz kommen. Och wann et elo wuel ze spéit wier, fir en Impakt op déi aktuell Well ze hunn, misst ee fir den nächste Wanter preparéiert sinn.

LSAP wëll sech réischt bei der Debatt positionéieren

Nach net positionéiert huet sech déi 3. Majoritéitspartei LSAP. Seng Partei hätt eng Positioun, wéilt déi awer eréischt e Mëttwoch matdeelen, sou den Deputéierten a President vun der Gesondheetskommissioun Mars di Bartolomeo.

"Mir hunn eis fir d'éischt Froe gestallt an eis Äntwerten op déi Froe ginn an doropshin eis Positioun festgeluecht an dat hei ass en zousätzlechen Austausch, deen eis weist, dass mer richteg louchen, fir net fir d'éischt ze schéissen an dann ze froen, mä fir d'éischt ze froen an dann eréischt déi richteg Äntwerten ze ginn."

CSV da bleift bei hirer Fuerderung fir eng allgemeng Impfflicht

De Claude Wiseler vun der CSV

"Well mer mengen, datt de Schutz da méi breet ass, wann notamment eng 4. Well oder eng 5. Well eng Kéier ausbrécht, well awer och nach eng Rei Better vu Leit ënner 50 Joer beluecht sinn, well mer och net wëssen, wéi mer mam Risiko vum Long-Covid eens ginn, a well mer soen, datt de Risiko awer do ass, datt wann een eng Obligatioun mécht fir Leit, déi just iwwer 50 Joer hunn, datt dat eng negativ Influenz op de Wëlle vun der Impfung fir Leit ënner 50 Joer kann hunn, déi sech da vläicht manner impfe loossen, well se sech manner concernéiert spieren. Dofir schwätze mir eis ganz kloer nach fir eng allgemeng Impfflicht aus."

Et géinge sech bei der Impfflicht vu 50 Joer un awer nach aner Froe stellen, sou de Claude Wiseler.

De Claude Wiseler vun der CSV (2)

"Wann een de Juristen nolauschtert, dann ass dee Krittär, wann een en Alterskrittär stellt an net eng allgemeng Impfflicht mécht, da muss ee jo dee Krittär, deen ee stellt och erklären, da muss deen och net-diskriminatoresch par Rapport zu anere Leit sinn. Meng Fro ass also manner eng psychologesch, wéi eng juristesch: wéi ass eng Cour constitutionelle, oder eng Cour des droits de l'homme vu Stroossbuerg, wéi stellt déi sech zu sou enger partieller, wou et net kloer, aus wéi engem Grond déi Krittären och ëmmer geholl gi sinn."

Et wier awer bereet d'Propositioun vum Expertegrupp als éischt Etapp z'ënnerstëtzen. Et wier ee frou, datt d'Experte sech fir de Prinzip vun enger Impfflicht ausschwätzen, esou de Claude Wiseler. Fir déi gréissten Oppositiounspartei wier eng allgemeng Impfflicht trotzdeem aus enger Rei Grënn méi sënnvoll. De Schutz wier doduerch méi héich, et wieren awer och nach vill Leit ënner 50, déi schlëmm krank ginn an dobäi kéim och nach de Problem vum Long-Covid.

Piraten schwätze sech géint Impfflicht aus, ADR weider dogéint

D'Piratepartei huet d'Basis consultéiert a wäert sech géint eng Impfflicht ausschwätzen, bei déi Lénk gëtt d'intern Debatt den Owend ofgeschloss, iwwerdeems d'ADR nach ëmmer géint eng Impfflicht ass. Noeneen, de Pirat Sven Clement, d'Nathalie Oberweis vun déi Lénk an den ADR-Deputéierte Jeff Engelen.

"Reng vum Ëmsetzbaren hale mer eng Impfflicht, och eng generell Impfflicht, haut fir ganz schwéier ëmsetzbar. Mir hu warscheinlech d'Dosen net, mir hunn d'Infrastruktur net, fir d'Leit séier genuch z'impfen a mir kréien d'Leit och net dozou, sech boosteren ze loossen, wou de Booster haut eng Recommandatioun ass, awer net an den Zouloossungspabeiere verankert ass."

"D'Impfflicht-Debatt hätt ee kënne méi fréi diskutéieren, virun engem hallwe Joer, respektiv virun engem Joer, wéi mer ugefaangen hu mat der Impfung, dat soen d'Dokteren och, déi elo hei waren, déi soten, et ass eigentlech verpasst ginn, fir vill méi fréi iwwert d'Impfflicht ze schwätzen."

"D'Experte ware fantastesch, se hu gutt erkläert, dat ass ganz kloer, mä ech hu perséinlech, an och fir den ADR si keng grouss nei Erkenntnisser erauskomm."

Och déi Lénk si géint eng Impfflicht de Moment

No enger Ëmfro an enger Debatt bannent der nationaler Koordinatioun vun déi Lénk, huet sech d'Partei an engem Schreiwes géint eng Impfflicht fir de Moment ausgeschwat. Dat well et nach ze vill Inconnuen an ze vill oppe Froe géife ginn. Et wéisst een net vu wéi enger Variant ee géing schwätzen, wann d'Impfflicht kéim an och net wéi effikass d'Vaccinen dee Moment sinn a wéi en Impftaux misst erreecht ginn. Donieft géifen et nach aner Alternative ginn, wouduerch eng Impfflicht esou den Ament net noutwenneg wier.