De Jean Weiler (CSV) wäert zesumme mat de Schäffe Romain Becker (DP) a José Gonçalves (CSV) den neie Schäfferot an der Süd-Gemeng forméieren.

Dat gouf e Méindeg den Owend am Gemengerot esou festgehalen, mat 7 zu 6 Stëmmen.

D’LSAP an Déi Gréng, déi bis ewell d’Soen an der Keeler Märei haten, hu kollektiv dogéint gestëmmt. D’CSV an d’DP kréien awer de Réck vum mëttlerweil onofhängege Marcel Humbert gestäipt, deen d’LSAP verlooss huet, nodeems hien am Dezember géint de Budget gestëmmt an domadder fir en Eclat zu Keel gesuergt hat.

Natierlech wier et eng wackeleg Majoritéit. Dat sot den designéierte Buergermeeschter Jean Weiler am RTL-Moiesjournal. Ma elo géif een awer probéieren, Rou an d'Gemeng ze kréien an dofir géif sech op d'Aarbecht an net op sech konzentréiert ginn. Prioritéit hätt den neie Budget, fir datt d'Gemeng ka funktionéieren. Aktuell Projete solle weider gedriwwen an nei Akzenter gesat ginn, och am Wunnengsbau. Och d'Leit an d'Veräiner solle mat agebonne ginn, fir d'Gemeng virun ze bréngen an nees zur Normalitéit zeréck ze fannen. Et wier wichteg, datt elo nees positiv iwwert d'Gemeng Keel géif geschwat ginn, well se wier derwäert, esou den designéierte Keeler Buergermeeschter Jean Weiler.

Den neie Schäfferot muss elo nach vereedegt ginn.

De kompletten Interview mam Jean Weiler