31 Prozent vun de Kanner an der Grondschoul an 43 Prozent vun de Jonken am Lycéesalter si manner zefridde mat hirem Liewen, wéi virun 2020.

D’Pandemie huet nach ëmmer en enormen Impakt op d’Wuelbefanne vun de Kanner – 31 Prozent vun de Kanner ënner 12 Joer an 43 Prozent vun de Jonken am Lycéesalter si manner zefridde mat hirem Liewen, wéi virun 2020. Dat geet aus dem zweeten Deel vun der Covid-Kids Etüd ervir, deen d’Fuerscherinne vun der Uni Lëtzebuerg zesumme mat der Unicef e Freideg de Moie virgestallt hunn. Dobäi hu sech verschidden Trenden, déi scho beim 1. Deel vun der Etüd erkannt goufen, confirméiert.

Covid Kids Etüd - Reportage vum Fanny Kinsch

D’Kanner géinge sech ganz vill Suerge maachen, virun allem d’Meedercher an déi méi grouss Kanner. An der Etüd wier zum Beispill gefrot ginn, wat fir d'Kanner dat schlëmmst an dat bescht wier an hirem Liewen am Moment, an do hätt sech ganz vill ëm Stierwen a Krankheet gedréit, sou d'Claudine Kirsch vun der Uni.lu.

"Dat heescht do si Kanner, déi soen dat schlëmmsten, dat ass natierlech den Doud, d'Stierwen, d'Krankheet. An dat beschten ass, wéi ech krank war, dass ech erëm schnell gesond war. 10 Prozent iwweregens vun de Kanner, déi déi Fro beäntwert hunn, wat ass dat beschten an hirem Liewen, déi hu gesot näischt. Et ass guer näischt gutt. 10 Prozent ass vill."

D'Kanner géingen och nach ëmmer méi Zäit doheem a virum Ecran verbréngen, wéi dobaussen.

"Do gesäit een u sech ganz kloer, déi kleng, déi si méi kreativ nach, déi liese méi, déi bastele méi, a wat se méi grouss sinn, wat déi Tendenz méi grouss ass Musek ze lauschteren oder näischt maachen oder natierlech déi sozial Medien."

Déi Jugendlech wieren elo 3,5 Stonnen den Dag virum Ecran den Dag, déi méi kleng Kanner 2 Stonnen den Dag, sou d'Claudine Kirsch.

"Dat ass ganz vill, et ass méi wéi se Hausaufgabe maachen, mee aus der Perspektiv vun de Kanner ass et och wichteg ze wëssen, datt 75 Prozent vun de Kanner soen, datt déi sozial Medien hinnen tatsächlech gehollef hunn an der Pandemie eens ze ginn."

D’Fuerscherinnen hunn och festgestallt, datt och wann d'Schoule gréisstendeels op waren, d’Kanner 2021 vill an der Schoul gefeelt hunn duerch Isolementer a Quarantänen.

"43 Prozent vun deene Klengen, 55 Prozent vun deene Groussen hu méi wéi 4 Woche gefeelt. Dat ass vill. Et war och een Drëttel, deen huet méi wéi 6 Woche gefeelt."

Si géingen dowéinst och fäerten, ze vill ze verpassen.

"55 Prozent vun deene Klengen, 96 Prozent vun deene Grousse soe si léiere manner, si fannen d'Aufgaben da méi schwéier, méi onverständlech, se maache manner Sënn an et ass e signifikativen Ënnerscheed. Also aus hirer Perspektiv ass et kloer, si wëllen an d'Schoul. Aus soziale Grënn, mee och ebe fir ze léieren."

Op Basis vun der neier Etüd huet d’Unicef och eng Rei Recommandatioune fir d’Politik ausgeschafft. Et solle weider Efforte gemaach ginn, fir d’Schoulen sou wäit et méiglech ass opzehalen, sou d'Isabelle Hauffels vun der Unicef.

"En anere wichtege Facteur wier d'Bildungsakteuren z'ënnerstëtzen sozial-emotional Léiermodullen z'entwéckelen an ëmzesetzen. Dës equipéieren d'Kanner mat wichtege kognitiven an emotionale Fäegkeeten, déi hinnen dann och hëllefen d'Erausfuerderungen am Liewen ze meeschteren."

Den Accès op Sport, Veräiner an ausserschoulesch Aktivitéite misst gefërdert ginn. Da missten och d’Elteren ënnerstëtzt ginn, fir alles ënnert een Hutt ze kréien, an et missten zum Beispill nach méi Programmer fir d’Elteren ausgeschafft ginn. D’Kanner géingen och nach méi Strukture brauche fir d’Santé mentale.

Bei der Etüd hu 621 Kanner tëschent 6 a 16 Joer matgemaach. D'Donnéeë goufen am Juni/Juli an am September 2021 erhuewen. D'Ouevre Grande-duchesse Charlotte huet d'Fuerschungsaarbecht finanzéiert.