Um 1. Grënnungs- an Nationalkongress goufen e Samschdeg de Moien d'Statutten an de Grondsazprogramm ugeholl, d’Exekutiv an den Nationalcomité gewielt.

"Gerecht gewënnt" war de Slogan vum Grënnungskongress vun der neier Partei Fokus. ëm de Frank Engel. De fréieren CSV-Politiker gouf zum Spëtzekandidat fir d’Walcampagne 2023 gewielt.

Thema Gerechtegkeet wier och de roude Fuedem, dee sech duerch de Grondsazprogramm vun der Partei zéie géif, huet de Parteipresident Marc Ruppert ënnerstrach. An der Logementspolitik, grad ewéi bei de Steieren. Ee méi gerechten Index, wou net deem enge säi Kafkraaftverloscht mat 80 Euro an dem anere säi mat 500 Euro kompenséiert gëtt. An ee méi gerechte Justizsystem, an deem een net eng hallef Éiwegkeet op en Urteel muss waarden, gouf nach erkläert.

Fir déi héich Logementspräisser an de Grëff ze kréien, wär d'Emphytheos eng wichteg Tëscheléisung. Fir dës Terraine misst de Bauperimeter vergréissert ginn, esou de Frank Engel.

"Et geet och net drëms mat esou enger Offensiv de ganze Logementsmarché ze revolutionnéieren, respektiv all dat anert ze ersetzen. Mee et geet drëms fir Sputt ze schafen fir déi, déi net genuch geierft hunn, net genuch verdéngen, net genuch op der Säit hunn."

De räsonabele Präis muss eng Kategorie vun der ganzer Logementspolitik ginn, sot nach de Frank Engel, net just vum soziale Wunnengsbau.

Wat d'Schoulpolitik ugeet, do wëll déi nei Partei sech fir eng eenheetlech ëffentlech Schoul asetzen, wou d'Sprooch keng Barrière ass. D'Schoulzäit sollt an hiren Aen ëm ee Joer erofgesat ginn. D’Schoulflicht bis 18 Joer wier net sënnvoll.

"Ech hunn en neie Frëndeskrees fonnt..."

“...Dat war net ze fréi, well dat huet mer gefeelt", sot de Frank Engel am Ufank vu senger Ried. An der Politik géif dacks vun Erneierung vun de Parteie geschwat ginn. Fokus hätt et elo scho fäerdeg bruecht, vill nei Leit an d’Politik ze zéien.

Fir d’Gemengewalen am Juni 2023 wëll Fokus sech do, wou se keng eege Lëscht huet, och u Biergerlëschte bedeelegen an dës mat Know How an Internetsäiten ënnerstëtzen. Esou hofft d’Partei fir d’Chamberwalen am Hierscht zousätzlech Kandidaten ze fannen.

Fokus. - eng Partei ouni fix Ideologie an ouni Virurteeler, huet de confirméierte Parteipresident Marc Ruppert ënnerstrach. Plaz fir eng nei Partei wär do, well et vill Problemer am Land géif ginn, déi net geléist géife ginn. An deels och net ugeschwat géif ginn, well se net an de "Storytelling vun engem gléckleche Land passe géifen".

De Parteipresident huet och d’Debatt ëm d’gratis Betreiung an de Maison-relaisen opgegraff. Et bräicht méi moralesch a finanziell Ënnerstëtzung fir Elteren, déi sech dréinen a kéiere géifen, fir méiglech vill Zäit mat hire Kanner ze verbréngen.