Nodeems e Samschdeg d'CSV hiren Nationalkongress haten, ass d'DP e Sonndeg zesummekomm.

D’Deputéiert Carole Hartmann iwwerhëlt de Posten als Generalsekretärin. De Max Hahn gëtt iwwerdeems éischte Vizepresident, weider Vizepresidente sinn de Claude Lamberty an de Marc Hansen. 

Et war deen éischte Kongress zanter der Pandemie. Do huet een dann och schonn eng gewësse Virfreed op d’Superwaljoer 2023 verspuert. 

DP-Nationalkongress/Reportage Danielle Goergen

Virop war ee frou fir de Kongress nees am Presidentiellen ofzehalen. Iwwer 300 Delegéierte waren dobäi.  Fir d’Corinne Cahen war et iwwerdeems dee leschten un der Parteispëtzt. Si huet hir Mandat als Parteipresidentin no 7 Joer néiergeluecht.  Fir si gouf et eng Standing Ovation. D’DP wéilt d’ Steierreform nach ëmmer ugoen, huet si an hirer Ried nach betount. Si géifen de System nach méi gerecht maachen ënnert anerem fir d’Monoparentauxen, Wittmänner a Wittfraen.

Mir musse kucken, datt jidderee muss individuell gekuckt ginn an net par Rapport zu senger Situatioun, wéi e mat engem aneren zesummelieft.” 

Wourop de Xavier Bettel awer kloergestallt huet, datt ee Verschiddenes villäicht net kéint maachen.  Et géif mat der DP kee Steierkaddo op Kredit ginn.

Den neie Parteipresident Lex Delles ass dann a senger Ried op d’Klimakris agaangen. D’Klimapolitik misst zwar ambitiéis sinn awer och sozial gerecht bleiwen. Et géif een d’Ziler nëmmen zesumme mat der Ekonomie erreechen.

“Jiddereen, deen de Klima géint dat Soziaalt a géint d’ Ekonomie ausspillt, wäert u sengen eegenen Ambitioune scheiteren. Klimaschutz, Solidaritéit an eiser Gesellschaft an eng staark Ekonomie ginn Hand an Hand.”

De Wëlle fir op klimafrëndlech Alternativen an der Wirtschaft ëmzeklammen wier do, erkläert nach den Tourismus- a Mëttelstandsminister. D’DP wier prett fir op dëse Wee ze goen.

Well wa mir Akzeptanz fir eng staark Klimapolitik wëllen erreechen, da musse mir jiddereen am Boot hunn. Souwuel d’Leit wéi och d’Betriber. An ech soe kloer, et ass keng Optioun fir eis Partei un dësen Ziler ze scheiteren. Mir sinn dat deene jonke Generatiounen, déi nach net gebuer sinn, schëlleg.”

De Fraktiounspresident Gilles Baum huet a Saachen Ettelbrécker Maternité, IRMen an de laange Waardezäite an de Klinicken géint d’LSAP gestëppelt.

“Mir brauchen e modernen a performante Gesondheetssystem am Land, deen dem Wuel vum Patient verflicht ass a mir hunn an der Chamber dozou eis Iddien op den Dësch geluecht a sinn der Meenung, datt Ideologie eleng eis an deem Dossier net méi weiderbréngt.”

Wärend déi eng schonns am Walkampf wieren a sech e “neie, faarwege Logo” géife ginn “a mengen et wier eng nei Partei” géif d’ DP sech weider op hir Aarbecht konzentréieren, esou de Gilles Baum.

Thema beim Kongress war dann och d’Ukrain.  Den Europadeputéierte Charles Goerens huet betount, datt och wann Europäesch Union an de leschte Méint méi no beienee geréckelt ass, d’Eenheet nach ëmmer net garantéiert ass. Et misst een ophalen, sech vun eenzele Personnagen, fir déi eng Ënnerschrëft ënner engem Vertrag näischt wäert ass, erpressen a blockéieren ze loossen.

De Premier Xavier Bettel huet och annoncéiert datt hien an de nächste Woche wäert op Kiew reesen.  Am Kontext vun der Pandemie huet den Demokrat dann awer eng Ausso gemaach, déi ze denke gëtt.

“Et war eng schwéier Zäit fir eis alleguer... Et ass net un eis de Bilan ze maachen, mir hunn dofir och gefrot, bei der OCDE fir e Bilan gemaach ze kréien vun der Covid-Politik, déi mer gemaach hunn. Mee ech mengen, wa mer kucken, wéi am Ausland d’Kris geréiert ginn ass, datt mer hei vu kengem Lektioune brauchen, och net an der Chamber.”

Nieft dem neie Parteipresident an der Generalsekretärin Carole Hartmann wäerten also de Max Hahn als éischte Vizepresident, de Claude Lamberty a Marc Hansen als weider Vizepresidenten an d’Myriam Feyder als Tresorière d’Partei déi nächst Jore leeden.