Zanter en Dënschdeg gëllt an der EU de sougenannte Gas-Noutfall-Plang.

Nei Gaspräisser am Hierscht / Reportage Maxime Gillen

Staat a Gemengen, Betriber an d'Leit ginn dozou opgeruff, fir massiv Energie anzespueren. Leit, déi mat Gas hëtzen, wäerte wuel fräiwëlleg hir Consommatioun zeréckschrauwen. Déi grouss Lëtzebuerger Fournisseuren hunn annoncéiert, datt déi nächst Gasrechnungen nach eemol wäerten an d'Luucht goen. D'Avancen am Hierscht wäerte wuel ëm ronn 80 Prozent gehéicht ginn, soen Enovos a SUDenergie.

Lëtzebuerg kritt de Gros vu sengem Gas iwwert d'Belsch. Ronn 60 Prozent vum importéierte Gas gëtt genotzt, fir Gebaier ze hëtzen, déi aner 40 Prozent ginn an der Industrie fir d'Produktioun gebraucht.

Well kee weess, wéi laang de Krich an der Ukrain nach dauert oder wéini d'Russen de Gaskrunn zoudréinen, sicht een no Méiglechkeeten, fir d'Präisser op den internationale Marchéen ze drécken. Eng Moossnam ass, datt d'EU hir Gasspäichere bis Oktober zu 90 Prozent wëll fëllen. Dës Mesure soll d'Präisser de Wanter iwwer stabiliséieren.

Do dernieft wëll d'EU, datt an de Memberlänner manner Gas verbraucht gëtt. Geplangt ass eng Reduktioun vu 15 Prozent. Och dat soll mëttelfristeg ee positiven Impakt op d'Präisentwécklung hunn.

Zolidd Hausse bei de Gaspräisser / Rep. Maxime Gillen

Bannent de leschten zwee Joer huet sech de Gaspräis quasi verzéngfacht. An och wann d'Gas-Fournisseuren d'Marchéspräisser net eent zu eent un de Client weiderginn, muss een an Zukunft wesentlech méi déif an d'Täsch gräifen, fir seng Wunneng am Wanter waarm ze kréien.

Et wier deemno derwäert sech Gedanken doriwwer ze maachen, wéi een Energie spuere kann. Allgemeng kéint et de Marché och berouegen, wa wesentlech manner Gas gebraucht géif ginn. D'Decisioun op europäeschem Niveau 15 Prozent manner Gas ze verbrauchen, hätt kuerzfristeg awer wuel kaum en Effekt, esou de Responsabele fir d'Vente vun der Energie bei Enovos, Claude Simon.

Déi Lëtzebuerger Fournisseure kafen de Gas an der Reegel ronn annerhallef bis zwee Joer am Viraus an. Fir dem Client e méiglechst gënschtege Präis kënnen z'offréieren, ginn zu ënnerschiddleche Momenter verschidde Quantitéiten akaaft, wéi de Claude Simon vun Enovos erkläert.

Deemno gëllt et d'Gas-Consommatioun dëse Wanter zolidd erofzeschrauwen, wann ee keng all ze béis Iwwerraschung am Portmonni wëll erliewen.