Dat war en gros de Fazit vum Premier Xavier Bettel, no de bilaterale Gespréicher mat de Vertrieder vum Patronat am Staatsministère.

En vue vun enger méiglecher nächster Tripartite am Hierscht oder Wanter, hat d'Regierung d'Gewerkschaften an d'Vertrieder vum Patronat um Donneschdeg getrennt vunenee getraff.

Bilateralen / Reportage Monica Camposeo

Bei dëse Gespréicher gouf virop doriwwer geschwat, wéi eng Donnéeën an Informatiounen néideg sinn, fir eng fondéiert Analys vun der aktueller Situatioun ze maachen, déi vun alle Gespréichspartner als fiabel an neutral Ausgangsbasis kann akzeptéiert ginn. Dat war dem Premier en Donneschdeg wichteg. Ausserdeem hätt een de Partner en aktuellen Iwwerbléck iwwert d'Situatioun presentéiert, esou de Premier Xavier Bettel.

Extrait Xavier Bettel

"Mir hu fir d'éischt den Här Fayot iwwert déi ekonomesch Situatioun de Point gemaach, dunn den Här Turmes iwwert d'Energiesituatioun an dunn d'Madamm Backes och iwwert d'Finanzsituatioun an ech hu schonn en nächste Rendez-vous de 14. am Nomëtteg ginn, wou mir dann och iwwert déi lescht Zuelen eis wäerten ënnerhalen."

Ganz änlech Téin koumen dann och vum Patronat. Wéi de President vun der UEL, de Michel Reckinger, betount huet, bräicht een eng gemeinsam ausgeschafften an akzeptéiert Analys. Et wéilt ee sech nämlech net vun Emotioune leede loossen.

Extrait Michel Reckinger

"Mir sinn an enger Preliminaire, fir eis do guer net vun Emotiounen dreiwen ze loossen. Duerno géife mir et gäre pragmatesch op Chiffere richteg beweisen, beleeë kënnen, déi Decisiounen, déi mir wëllen huelen. Ech hoffen dass dat eng éierlech Tripartite gëtt, keng politiséiert Tripartite gëtt virun de Walen. Wa mir éierlech an enger Tripartite si fir d'Wuel vum Land, da wäerte mir och richteg Decisioune kënnen treffen."

Et hätt een och Zuelen aus den eenzele Secteure virgeluecht, esou den UEL-President Michel Reckinger, fir méi transparent iwwert déi aktuell Situatioun kënnen ze diskutéieren.

RTL

© Maxime Gillen

D'Mesuren, déi bei enger eventueller nächster Tripartite geholl ginn, sollen novollzéibar sinn a mat Zuelen ënnerluecht. Dat hunn esouwuel de Michel Reckinger, President vun der Unioun vun de Lëtzebuerger Entreprisen, wéi och de Premier Xavier Bettel direkt e puer Mol betount. Et wéilt een op deem nämmlechte Point de départ sinn, ier een d’Verhandlungen zu drëtt ophëlt, esou de Premier.

De 14. September geet et weider mat bilaterale Gespréicher. D'Gewerkschaften an d'Patronat treffe sech also da mat neien, adaptéierten Donnéeë mat der Regierung. Wéini dann d'Tripartite zesumme kënnt, kéint een den Ament nach net soen. Dat géing dem Premier no vun den Zuele vum Statec ofhänken, also dovunner, wéini eng nächst Indextranche da genee sollt erfalen. Wann een dat bis weess, wéisst een och, wéi vill Zäit ee sech huele kann. Dat kéint dann och nach bis an de Wanter eragoen.

D'Fro, ob et den Zuelen no, wéi se aktuell virleien, fir d'Betriber méiglech wier, eng Indextranche nach dëst Joer auszebezuelen, wollt den UEL-President Michel Reckinger net beäntweren.

Rout Linnen oder konkret Fuerderunge waren um Donneschdeg weder vun de Gewerkschaften, nach vum Patronat a scho guer net vun der Regierung erauszehéieren.

Och d'Gewerkschafte wëlle fundéiert Analys op Basis vu geneeën Donnéeën

Et wéilt een eng déifgräifend Analys vun der Situatioun maachen, an doropshi sech genuch Zäit loossen, fir Léisungen auszeschaffen. Dat waren d'Aussoe vun de Gewerkschaften no de bilaterale Gespréicher mat engem Deel vun der Regierung.

En vue vun enger weiderer Tripartite sinn d'Gewerkschaften OGBL, LCGB a CGFP mam Premier Xavier Bettel, der Finanzministesch Yuriko Backes, dem Energieminister Claude Turmes, dem Mëttelstandsminister Lex Delles an dem Wirtschaftsminister Franz Fayot beieneekomm. Grond fir eng méiglech weider Tripartite ass jo d'Präisdeierecht, déi weider klëmmt, grad am Beräich vun der Energie.

Konkretes war op der Plaz net gewuer ze ginn. D'Finanzministesch Yuriko Backes huet d'Stëmmung bei hirer Sortie als convivial bezeechent. Inhaltlech wollt si sech allerdéngs net äusseren.

Allgemeng wëll ee sech dës Kéier méi Zäit ginn, huet et vun de Gewerkschafte geheescht. Et soll nämlech eng fundéiert Analys vun der aktueller Situatioun gemaach ginn. Dat dann och op Basis vun den néidegen Donnéeën, wéi de President vun der CGFP Romain Wolff erkläert huet. Et wier de Gewerkschafte besonnesch wichteg, op Basis vu geneeën Donnéeën ze schaffen.

An engem Communiqué huet d’Staatsbeamtegewerkschaft no de Bilateralen nach emol widderholl a betount, dass d’Verréckele vun Indextranchen net dierf d’Reegel ginn, soss géingen nämlech strukturell Problemer entstoen. Éischter missten nei Moossnamen envisagéiert ginn, wéi d’Upassung vun der Steiertabell un d’Inflatioun, dat wier zanter 2009 net méi geschitt. Antëscht géing d’Präisdeierecht och d’Mëttelschicht erreechen, esou ass et nach am Communiqué ze liesen. Dowéinst dierften d’Mesuren net eng breet Gesellschaftsschicht ausschléissen, mengt d’Staatsbeamtegewerkschaft.

Léisunge fir déi aktuell awer schwiereg Lag ze fannen, wier net einfach. D'Situatioun wier zanter der leschter Reunioun virun e puer Méint nach méi schlecht ginn. Grad och well jo d'Energiepräisser weider duerch de Plaffong ginn. An dat wier sécher eent vun den Haaptsujeten, esou d'Presidentin vum OGBL, Nora Back.

Et wier wichteg gewiescht, dass den Energieminister Claude Turmes bei dësen éischte Verhandlungen dobäi war, fir en Aperçu iwwer d'Entwécklunge vun den Energie- a Gaspräisser ze ginn. D'Presidentin vum OGBL rechent domadder, dass sech déi nächst Tripartite och ganz staark ronderëm dat Thema wäert dréinen.

Iwwer den Index wier iwwerdeems guer net geschwat ginn, weder mam Patronat nach mat de Gewerkschaften. Allerdéngs schéngt et jo warscheinlech, dass dëst Joer nach eng weider Indextranche misst erfalen. An emol ofgesinn dovun, dass d'Gewerkschafte jo scho laang fuerderen, dass den Indexsystem erëm normal weiderleeft, huet d'Presidentin vum OGBL Nora Back nach eng Kéier betount, dass et bei dëser Tripartite net nëmmen ëm den Index dierft goen.

Extrait Nora Back

"Et ass keng Léisung, fir en Index net auszebezuelen. Et ass wichteg, dass dës Indextranche ausbezuelt gëtt. Mä dat Allerwichtegst ass, dës Tripartite ka sech net nëmmen ëm den Index dréinen. Hei si mir an enger Kris déi wäit doriwwer eraus geet. D'Kafkraaft vun de Leit ass bis wäit an d'Mëttelschicht getraff. Jidderee wäert dat ze spiere kréien, déi Explosioun vun de Präisser. Mir mussen alleguer oppe si fir all méiglech Solutiounen. An et ass eng Dialogbereetschaft do."

Obschonn den Index en Donneschdeg nach guer net ugeschwat gi wier, kéint dat awer um Enn ee vun de Knackpunkte ginn. Am Interview huet d'Nora Back nämlech zouginn, dass et éischter onwarscheinlech wier, dass et en Accord wäert ginn, wann dëst Joer nach eng Indextranche soll verréckelt ginn. Gläichzäiteg hu sech awer all d'Gewerkschaftsvertrieder dofir ausgeschwat mat méiglechst oppenem Geescht an dës Negociatiounen eran ze goen.