D'Regierung wëll mam neie Covid-Gesetz d'Restriktioune bis viraussiichtlech Enn Mäerz dat nächst Joer just nach op e Minimum reduzéieren.

Neit Covidgesetz / Reportage Claude Zeimetz

Den Ament bleift d'Covidsituatioun hei am Land entspaant, obwuel d'Infektiounen unzéien. D'Populatioun wier breet immuniséiert an déi aktuell Omikron-Variant manner virulent. Dowéinst plangt d'Regierung, d'Isolatioundauer vu 7 op 4 Deeg erofzesetzen. Et kritt een och nach ëmmer e Krankeschäin fir 4 Deeg. Zil ass, fir z'evitéieren, datt ze vill Krankeschäiner an der Aarbechtswelt zu Problemer féieren. Wann e Covid-Patient nom 4. Dag nach Symptomer huet, muss hie mat sengem Dokter kucken, fir de Krankeschäin verlängert ze kréien. Mam neie Gesetz gëtt kee systematesche Contact tracing méi gemaach, dee soll just nach bei gréissere Clusteren zum Beispill an Altersheemer reaktivéiert ginn.

De sougenannte forcéierten Hebergement, dee bis elo nach am Gesetztext dra stoung, gëtt gestrach. Dat wier ni zanter dem Ufank vun der Pandemie applizéiert ginn a wier och net méi proportional. Dat heiten ass awer net ze verwiesselen mat der Isolatioun. Déi bleift, gëtt awer eben op 4 Deeg reduzéiert.

Hierschtwell baut sech op

Blo-Rout-Gréng behält sech d'Optioun, fir d'Gesetz am Noutfall séier z'adaptéieren, sollt méi eng schwéier Variant optrieden. De leschte Previsiounen no wier am November mat bis zu 800 Infektiounen den Dag ze rechnen. D'Wëssenschaftler rechne mat 30 bis 50 Hospitalisatiounen, dovunner der 5 bis 10 op der Intensivstatioun. Domadder géif de Spidolssecteur net an d'Laberente kommen. Fir Onsécherheet suergt allerdéngs d'Virusmutatioun BA.2.75, déi an Indien entdeckt gouf an amgaangen ass, sech auszebreeden. Dës Omikron-Ënnervariant ass méi ustiechend an de Vaccin ass manner effikass. Eppes, wat d'Gesondheetsexperten also am A wäerten hale mussen. Zu Lëtzebuerg goufen d'Woch virun der Rentrée 9 Fäll dovunner detektéiert.

37% vun de Leit iwwer 60 Joer krute bis elo den zweete Booster

A propos Vaccin: jiddereen iwwer 12 Joer ka sech an Zukunft dann eng zweete Kéier "boosteren" loossen. D'Regierung baséiert sech heifir op en Avis vum Conseil Superieur fir ustiechend Krankheeten vun Enn September. Bis elo war den zweete Rappell jo nëmmen zougelooss fir Leit iwwer 60 Joer a vulnerabel Persounen. D'Santé wëll awer besonnesch eeler Leit nach méi sensibiliséieren, hiren zweeten Booster maachen ze loossen. Bis elo hunn nämlech grad mol 37,4% deen zweete Rappell maache gelooss. Hei ass also nach vill Iwwerzeegungsaarbecht gefrot.

Donieft gëtt den zweete Rappell och fir d'Personal am Gesondheetssecteur encouragéiert.

D'Direktioun vun der Santé huet och d'Testrecommandatiounen iwwerschaffen. Tester sollen an Zukunft just nach fir symptomatesch Leit limitéiert sinn, besonnesch, wann et sech ëm Vulnerabeler handelt. Et soll prioritär a Klinicken an Alters- a Fleegeheemer getest ginn oder wann ee krank ass. Fir de Rescht gëtt op Selbsttester gesat.

An d'Doktere sollen an den nächste Wochen eng Formatioun kréien iwwert d'Covid-Medikamenter. Paxlovid zum Beispill kritt een zanter dem 1. September an der Apdikt.