No der Sonn e Méindeg de Mëtteg gëtt et an der Nuecht e bësse méi ongemittlech.

Et gëtt naass, a wéi et schéngt net ze knapps. Den nationale Wiederdéngscht Meteolux huet fir dat ganzt Land eng Warnung erausgi wéinst zolittem Reen tëscht Méindegowend 22 Auer an Dënschdeg de Mëtteg 12 Auer. Plazeweis kéinte bis zu 80 Liter op de Metercarré eroffalen.

D'Vigilance orange gouf dann och vun der Cellule d’évaluation du risque intempéries-inondations (CERI) erausginn. D'Cellule hätt sech e Méindeg de Moien eng éischte Kéier getraff, fir d'Situatioun ze evaluéieren. Si rechent mat Reequantitéite vun tëscht 25 an 50 Liter de Metercarré, woubäi lokal bis zu 80 l/m2 méiglech wieren.

An der Nuecht géif et e verstäerkten Iwwerschwemmungsrisk ginn, notamment laanscht d'Uelzecht a laanscht kleng Gewässer am Süden an am Oste vum Land.

A Frankräich huet och d'Météo-France fir d’Départementer Moselle a Meurthe-et-Moselle eng orange Warnung erausginn. Fir eis Grenzregioune si bis zu 80 Liter op de Metercarré Ree gemellt.

Déi weider Entwécklunge vun der Meteo kënnt Dir op MeteoLux oder op LU-alert.lu suivéieren.