Et gëtt den Ament Problemer mam Drénkwaasser zu Miersch. Wéi aus enge Schreiwes ervirgeet, ass déi ganz Gemeng betraff.

Aus Precautiounsgrënn sinn d’Awunner opgeruff, fir d’Krunnewaasser den Ament 10 Minutten ofzekachen, ier een et ka benotzen fir ze drénken, Iessen ze preparéieren oder ze spullen. Et soll een dann och kee Krunnewaasser benotzen, fir réit Uebst a Geméis ze wäschen oder fir Äis ze maachen.

Schreiwes vun der Gemeng Miersch

Op Nofro krute mer d’Prezisioun, datt notamment den Haaptwaasserbaseng vun der Gemeng bakteriologesch verknascht ass. Wéi et zu der Pollutioun koum, ass bis elo nach net gewosst. Fir den Ament ginn déi Responsabel dovunner aus, datt de Problem a priori nach déi nächst Deeg bestoe bleift an nach eng Woch kéint daueren, bis d'Waasser nees propper ass.