De Januar 2025 war e Wantermount mat ze vill Reen, kalen Temperaturen an nëmme wéineg Sonn. D’Wiederstatioun um Findel huet däitlech ze vill Ree gemooss an den 8. Januar stoung dobäi besonnesch am Fokus: Et war net nëmmen deen naassten Dag vum Mount mat 23 mm Reen, mee och deen, op deem d’Waasser deels a Form vu Schnéi vum Himmel gefall ass, 4 cm goufen um Findel gemooss.
Mee wéi huet sech de Rescht vum Mount entwéckelt? Wéi dacks gouf d’Sonn gesinn a wéi steet dëse Januar am Verglach mat de Jore virdrun?
Hei fannt dir all d’Detailer zu den Temperaturen, dem Reen, de Sonnestonnen an nach munches méi!
Temperaturen: D’Temperaturen am Januar ware liicht iwwer der Moyenne, awer ouni extrem Wäerter. Déi héchst Temperatur gouf mat 12°C de 6. Januar op der Wiederstatioun Findel gemooss, wärend déi niddregst bei -7,1°C de 14. Januar louch. Am Verglach: De wäermste Januar war 2007 mat enger Moyenne vu 4,9°C, de killste war 1963 mat -6,3°C.
Reen: Mat 151 mm Ree war de Januar extrem naass. Dat ass 211 % iwwer der Moyenne, deen op Basis vun de Joren 1991-2020 op der Statioun Findel registréiert gouf. Déi naasst Period war den 8. Januar mat 23 mm Reen an engem Dag, deen och den Dag mat der héchster Schnéihéicht vu 4 cm war. Am Januar 1995 gouf et de Rekord mat 197,1 mm, dat Joer drop 1996 war dat dréchenst mat just 6,3 mm.
Sonn: D’Sonn war am Januar rar ze gesinn. Mat nëmmen 43,2 Sonnestonnen op der Statioun Findel gouf den Duerchschnëtt vun 52 Stonnen net erreecht. Virun allem an der zweeter Hallschent vum Mount war et dacks gro niwweleg an dréif.
Wand a Schnéi: Déi héchst Wandspëtzte goufen de 6. Januar mat 87 km/h gemooss, dat war dann och ee Stuermdag. Schnéi war kaum en Thema: Maximal gouf et 4 cm den 8. Januar op der Statioun Findel a just dräi Deeg mat Schnéi. D’Statioun vun der Asta zu Reiler huet allerdéngs schonn den 2. Januar 5,8 cm gemooss a quasi den hallwe Januar ass liichte Schnéi op där Statioun gemellt ginn.
Renndeeg: Am Januar gouf et siwen Äisdeeg, also Deeg wou d’Temperatur de ganzen Dag ënnert 0°C blouf. Ausserdeem goufen et dräi Schnéideeg. Reendeeg (>0,1 mm) gouf et der 18, dovunner 17 mat méi wéi 1 mm Reen, wat däitlech iwwer dem Duerchschnëtt läit. Ee Stuermdag gouf et och, de 6. Januar mat Wandspëtzte bis 87 km/h.
Fazit an Ausbléck: De Januar 2025 war fiicht, gro a liicht ze mëll. D’Reequantitéit war däitlech ze héich an d’Sonn huet sech nëmme wéineg gewisen.
Wiederprevisioun fir Sonndeg, den 2. Februar 2025: Lëtzebuerg bleift ënner Héichdrockafloss. No enger kaler Nuecht mat Temperature bis -7°C léise sech Niwwelfelder bis mëttes op. Duerno gëtt et vill Sonn bei 2 bis 6°C a just liichtem Wand. An der neier Woch forméiert sech dann erëm méi Niwwel an et gëtt méi gro a kal.
