Kuerz virun 12.30 Auer waren d’Rettungsdéngschter aus der Stad op Hollerech an d’Rue de la Semois geruff ginn, nodeems hei e Cyclist vun engem Auto ugestouss gouf. De CGDIS preziséiert an hirem Bulletin, datt de Cyclist net beim Accident blesséiert gouf.
Annerhallef Stonn méi spéit hat et dann eng éischte Kéier op der RN07 um Schinker geknuppt. Hei waren zwee Autoen anenee gerannt. Bei der Kollisioun goufen zwou Persoune blesséiert, déi vun der Air Rescue an dem Samu-Noutdokter versuergt goufen. Donieft waren d’Rettungsekippe vu Housen a Pëtschent op der Plaz.
Keng dräi Stonne méi spéit goufen d’Ambulancieren an d’Pompjeeë vun Housen nach eng Kéier op de Schinker geruff, nodeems hei en Auto an e Bam gerannt war. Eng Persoun gouf beim Accident blesséiert.
