RTL - Mam Scooter op Lëtzebuerg: "Ich will ein bisschen raus, ich will auch ein bisschen leben"

Aus dem héijen Norde vun Däitschland ass den Denis dëse Summer mam Scooter op Lëtzebuerg gereest. Hien huet eis seng Liewensgeschicht erzielt.

An de Felder tëscht Beetebuerg a Fréiseng, steet zanter e puer Wochen e klengt wäisst-grot Zelt. Hei wunnt den Denis S., 51 Joer, gebierteg vu Jork a Niedersachsen, just eng hallef Stonn vun Hamburg ewech.

Mëtt Juli ass hien hei ukomm, eleng um Scooter, mat net vill méi wéi deem wat a seng Boxen a säi Rucksak gepasst huet.

"Vor ein paar Jahren ist mein Bruder, der letzte Angehörige meiner Familie gestorben und ich bin jetzt ganz alleine in Deutschland. Was soll ich mein Leben dort verschwenden? Ich will ein bisschen raus, ich will auch ein bisschen leben", seet den Denis, wéi ech en op engem fraschtege Samschdegmoien tëscht sengem Zelt an engem improviséierte Campingstull begéinen.

Säi Brudder Sascha ass 2022 am Alter vun nëmme 44 gestuerwen, e Verloscht, deen en nach ëmmer déif trëfft.

Berufflech huet hien a Logistikzentere geschafft, mee déi lescht Joren hat hie kee feste Job méi. Zu Réimech huet hien d’Chance genotzt, am September wärend der Drauwelies auszehëllefen.

"Ich fand es eine interessante Erfahrung. Es ist aber eine sehr harte Arbeit."

"Man muss einfach seinen Mund aufmachen"

D’Gespréich mam Denis ass ganz oppen an éierlech.
"Die Luxemburger sind sehr offen. Sind sehr positive Menschen, habe ich bemerkt. Etwas was mir in Deutschland sehr fehlt."

Eigentlech hat hie virgehat, nach méi wäit ze fueren, bis erof a Spuenien.
"Das war mir dann schlussendlich doch ein sehr weiter Weg", seet hien a laacht: "Da hab' ich gedacht, bleib' doch mal lieber hier in Luxemburg."

Am Mäerz gëtt den Denis 52 Joer. Hei zu Lëtzebuerg wëll hien nei starten: "Meine Zukunft ist, dass ich möglichst schnell eine Wohnung und Arbeit finde damit ich mich in die Gesellschaft integrieren kann."

E puer Meter vu sengem Zelt ewech steet nach e klengt hellblot Zelt: "Das ist mein direkter Nachbar. Ein Herr aus Moldawien. Dem war es aber zu kalt und hat deshalb die letzte Nacht nicht im Zelt verbracht."

Den Denis grinst, zitt d’Kap hanner d’Oueren a wénkt mir frëndlech Äddi, éier hien a säin Zelt zeréckgeet.

Les photos diffusées sur ce site sont soumises à des droits d’auteurs et ne peuvent être copiées, modifiées, vendues, sans l’autorisation préalable du propriétaire du site en question.