Déi wichtegst Froen, kuerz a knapp beäntwert
Vum 1. Dezember 2025 un gëtt zu Lëtzebuerg Radio och iwwert DAB+ gesent. An dësem Artikel fannt Dir ee Résumé vun deene wichtegste Froen.
Wat ass DAB+
DAB+ ass eng digital Norm fir Radiosprogrammer ze iwwerdroen.
Kléngt mäi Radio iwwert DAB+ besser ewéi am UKW Empfang?
DAB+ proposéiert eng besser Tounqualitéit. D’Dauschen dat ee vum UKW Empfang kennt gëtt et net méi. D’Tounqualitéit bleift ëmmer déi selwecht, och wann den Empfang méi schlecht gëtt. Eréischt wann den Empfang ze schlecht gëtt, héiert ee guer näischt méi
Kann DAB+ méi ewéi UKW/FM?
Nieft der besserer Tounqualitéit kann e Radiosender iwwert DAB+ och nach zousätzlech Informatioune matschécken (zum Beispill de Logo, mä och wéi ee Lidd grad leeft, de Cover vum Lidd, mä och Informatiounen iwwert d’Emissioun déi ee grad lauschtert.
Brauch ech een neien Apparat fir Radio iwwert DAB+ ze lauschteren?
Jo! Den Apparat muss DAB+ empfänke kënnen. Al UKW Radioen hunn déi Optioun net. Méi rezent Apparater kënnen awer schonn ënner Ëmstänn DAB+ Empfang hunn. Et ginn awer Adapter mat deenen een och op méi engem alen Apparat DAB+ empfänke kann. Wien awer weider iwwert UKW/FM lauschtert, kann dat weider mat senger ale Radio maachen. Do ännert näischt.
An am Auto?
An der EU mussen d’Autosradioen, déi zanter 2021 an neien Autoe verkaf ginn, DAB+ empfänke kënnen. Et ginn awer och scho Modeller déi virun deem Datum DAB+ Empfang méiglech gemaach hunn. Wann den Auto ze al ass, ginn et Adapteren, mat deenen een DAB+ Empfang u méi alen Autosradioe méiglech maache kann.
Vu wéini un? Fir wéi laang?
Zu Lëtzebuerg gëtt DAB+ vum 1. Dezember 2025 un offiziell diffuséiert. D'DAB+ Lizenz gëllt fir 10 Joer, kann duerno awer verlängert ginn.
Wéi eng Programmer kann een op DAB+ lauschteren?
Déi 7 national a regional Programmer déi ee bis elo zu Lëtzebuerg iwwert UKW/FM lauschtere konnt (zum Beispill RTL Radio Lëtzebuerg, RTL Radio – Deutschlands Hit Radio) ginn et elo och iwwert DAB+. Dobäi komme 5 nei Programmer (dorënner RTL Today Radio), déi ee bis elo nach net (oder nëmme schlecht) iwwert Antenn zu Lëtzebuerg lauschtere konnt.
Wéi fannen ech d’DAB+ Programmer op mengem Radio?
Am Auto brauch een näischt ze maachen, den Autosradio fënnt d’Sender déi eng empfänkt vum selwen. Do sti se an der Senderlëscht a kënne vun do als Favoritte gespäichert ginn.
Op engem Radio doheem muss ee no neie Programmer scannen. Wéi dat geet steet an der Beschreiwung vum Apparat.
Wat geschitt mam UKW/FM?
Bis op Weideres näischt. Et gëtt weider iwwert UKW/FM gesent. DAB+ ass méi eng modern an effizient Norm fir Radio ze iwwerdroen, déi bei déi aktuell Offer dobäi kënnt. Ob a wéini UKW/FM eventuell ausgeschalt gëtt, hänkt vu ville verschiddene Facteuren of, dofir ass et zu dësem Zäitpunkt net méiglech eng präzis Ausso ze maachen.
Firwat DAB+ an net Internetradio?
DAB+ ass am Auto grad esou einfach ze benotzen ewéi UKW/FM Radio: Radio un, Sender auswielen, lauschteren! Ausserdeem ass DAB+ gratis, et brauch ee keen Abo fir Radio kënnen ze lauschteren.
Doheem héieren ech keen Toun iwwert den DAB+ Radio!
DAB+ Empfang ass virun allem am Auto am Beschte méiglech. Duerch d’Bauweis vun Haiser an hir Isolatioun, ass Empfang bannenan heiansdo méi komplizéiert. Dat läit och dorun, datt DAB+ mat manner Leeschtung sent. Heiansdo geet et duer d’Antenn anescht ze orientéieren, oder de Radio méi no bei eng Fënster ze stellen.
Wat ass DAB+ a wéi funktionnéiert dat?
Wéi eng Virdeeler huet DAB+ géintiwwer UKW/FM?
