Deen neien CSV-President war dëse Samschdeg eisen Invité an der Emissioun Background am Gespréich.

Et ware keng 6 besonnesch roueg Wochen, domadder hat hien awer och net gerechent. "Ech wollt President gi vun der CSV, fir d'Partei nei opzestellen", sot den neien CSV-President e Samschdeg de Mëtteg. Hie war eisen Invité an der Emissioun Background am Gespréich.

Méiglech intern Diskussiounen wollt de Frank Engel net weider kommentéieren. De Serge Wilmes, deen och fir d'Presidence kandidéiert hat, hat hie jo am RTL-Interview attackéiert a kritiséiert. Hien hätt net méi ganz vill Loscht op déi Saachen zréckzekommen. Hie wéilt sech engem Gespréich net verweigeren, de Ball géif awer elo éischter beim Serge Wilmes leien. Hie géif sech gären iwwer Inhalter auserneesetzen, dat wär awer eppes anescht wéi perséinlech Attacken, dat wär éischter schlechte Stil, huet de Frank Engel gemengt. Ugeschwat, ob disziplinaresch Suitte fir de Serge Wilmes an d'Spill bruecht hat, sot hien, datt et eng Diskussioun am Nationalcomité gouf, dat géif awer intern bleiwen an net vun him kommentéiert ginn.

De Frank Engel huet jo keen nationaalt Mandat, ass jo nach Europadeputéierten. Hien ass awer och an de Fraktiounssëtzungen derbäi. Hie kéint sech net iwwer Problemer bekloen. Et géif en oppenen an éierlechen Ëmgang matenee ginn.

D'CSV gouf wéinst hirer Lëscht fir d'Europawale kritiséiert, net genuch bekannte Leit wären drop. De Frank Engel fënnt et e bëssen apaart, wann een eng Erneierung wéilt, géif ee reprochéiert kréien, datt een nei Leit géif siche goen. Natierlech wären dat da méi onbekannten Nimm. Et wäre 6 Leit, déi sech resolut géife fir Europa asetzen. Net därer déi, déi sech am Oktober an d'Chamber fir 5 Joer wiele gelooss hunn.

D'Viviane Reding ass jo net op der Lëscht, dat wär eng Fro vun der Glafwierdegkeet, mengt den CSV-President. D'Viviane Reding hätt am Europaparlament demissionéiert. Si géif dat Eescht huelen, wéilt an der Chamber bleiwen, eppes aneres géif et jo net ginn, well d'CSV an der Oppositioun ass, an net nees Europa probéieren.

Natierlech wéilt een déi 3 Sëtz am Europaparlament verdeedegen, déi een aktuell huet. Mä mat engem gudde Resultat kéinten et awer och just zwee Sëtz ginn, sou de Frank Engel.

Fir d'Mënschen an Europa – mat deem Slogan geet d'CSV an d'Europawalen. Nächste Samschdeg ass hiren Europakongress zu Gréiwemaacher.

AUDIO: Background am Gespréich mam Frank Engel

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.