Si ass den drëtten Ombudsman deen d'Land huet, nom Marc Fischbach a Lydie Err. E Samschdeg war si eis Invitée an der Emissioun Background am Gespréich.

Bei de staatlechen a kommunalen Administratioune muss et nach vill méi de Reflex ginn, am Fall vun engem Problem d'Bierger bei den Ombudsman ze schécken. Dat wënscht sech d'Claudia Monti. Si ass zanter zwee Joer um Poste vum Ombudsman a war de Samschdeg de Mëtteg Invitée an der Emissioun Background am Gespréich.

Déi geléiert Affekotin vermëttelt tëscht Administratiounen a Bierger, déi am Fall vun engem Sträit op kee gréngen Zweig kommen. Hier Missioun ass, ze verhënneren, dass d'Affär muss viru Geriicht. An deene meeschte Fäll ginn déi eenzel Dossiere positiv ofgeschloss. 2018 war dat an 80% vun de Reklamatiounen de Fall. Am Laf vum leschte Joer gouf de Service vum Ombudsman zum Beispill mat ronn 90 Dossiere saiséiert, déi de Logementsministère betraff hunn. 14 Reklamatiounen hunn den Transportministère concernéiert, bei der Santé, respektiv der Sécurité sociale waren iwwer 130 Dossieren.

Reklamatiounen, déi der Claudia Monti am meeschten um Mo leien, sinn déi, déi de Cedies betreffen, dat heescht d'Studiëbourssen. Schold dru wier een informatesche Problem, wou Leit eng Bourse kruten, déi se net zegutt haten an elo mussen zeréckbezuelen. Dat kann net sinn, seet d'Mediatrice. Op deem Punkt wieren den Ombudsman an déi betraffen Administratioun net op enger Wellelängt an dat wier sauer fir déi betraffe Studenten.

D'Claudia Monti ass als Ombudsman och externt Kontrollorgan vum Prisong, dat heescht och vun Institutioune wéi Dräibur, Giwenech, der Unisec, oder nach dem Centre de Retention an de Psychiatrien. Hir Missioun ass, ze kucken, dass d'Mënscherechter respektéiert ginn. Ee Volet, deen d'Claudia Monti besonnesch beschäftegt, ass de Fait, dass nach ëmmer Mineure kënnen am Prisong zu Schraasseg placéiert ginn. Dat wier een No-Go, seet d'Mediatrice. Si huet an deem Kontext och d'Reform vum Jugendschutzgesetz kritiséiert, wou där spezieller Situatioun vum Jugendleche misst Rechnung gedroe ginn. Den Haaptproblem wier, dass et reng theoretesch nach ëmmer méiglech ass, wann d'Unisec zu Dräibur, wou et aktuell 12 Plaze ginn, voll ass, dee Jugendleche kann an de Prisong kommen, oder och soss, wann d'Gericht dat decidéiert, op Schraasseg kënnt.

AUDIO: Background am Gespréich: Claudia Monti

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.

D'Claudia Monti beim Corinne Folscheid (r.) am "Background".