D'LSAP-Politikerin Paulette Lenert war dëse Samschdeg an der Mëttesstonn eis Invitée op RTL an der Emissioun "Background am Gespréich".

De Beruff Minister war méi Neiland wéi erwaart, dat seet d'Paulette Lenert. D'Ministesch fir Konsumenteschutz a Kooperatioun war e Samschdeg d'Invitée an der Emissioun Background. Si wier als fréier Beamtin zwar no un der Politik gewiescht, wier et och gewinnt, fir sech an d'Dossieren eranzeschaffen, ma d'Komponent Ëffentlechkeet wier nei.

A puncto Konsumenteschutz wier een elo am Gaangen de Ministère opzebauen. Eng Ekipp vun 20 Leit sëtzt den Ament zu Stroossen an de Gebailechkeete vun der sécurité alimentaire, geschwënn dierft de Ministère an de Forum Royal plënneren. Allgemeng wier et d'Zil, fir d'Rechter vum Konsument méi visibel ze maachen.

Eent vun de prioritären Themen ass d'Sammelklo, mir wieren do hannendran an dofir wier een am Gaangen, dodrun ze schaffen, seet d'Ministesch. Si hofft, datt bis de Summer konkret Iddien um Dësch leien an datt bis Enn dës Joers e Projet kann deposéiert ginn. Et wäert ee sech un auslännesche Modeller inspiréieren, d'EU wäert jo och Basis-Standarden definéieren.

Bei der Kooperatioun gëtt jo ënner anerem mat Partnerlänner a mat ONGen zesummegeschafft. D'Partnerlänner ginn no Kritären erausgesicht, déi Kooperatioune ginn och evaluéiert. Ob et zu Changementer kënnt, ass nach net decidéiert. Et wier awer méiglech, datt nei Partnerlänner kommen, eng Pist wiere Maghreb-Länner, do géifen elo mol Analyse lafen.

D'Paulette Lenert war iwwerrascht, datt si ugeruff gouf am Hierscht. Si hat net vill Zäit ,fir sech ze decidéieren an huet „jo“ gesot, fir mat an d'Regierung. Si war net mat an d'Chamberwalen, well si als Regierungsbeamtin eng gewëss Neutralitéit wollt behalen.

E „Quereinstieg“ wier wuel net den normale Wee, mä awer och eng Form vun Erneierung.

AUDIO: Background am Gespréich mam der Paulette Lenert

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.