De François Biltgen, Riichter um europäesche Geriichtshaff, war e Samschdeg an der Mëttesstonn eisen Invité an der RTL-Emissioun "Background am Gespréich".

Hie war Deputéierten a Minister, ënnert anerem Minister fir d'Justiz. Zanter 2013 sëtzt hien als Riichter um Europäesche Geriichtshaff, deen oppasst, datt d'europäescht Recht an alle Memberstaaten op déi selwecht Manéier ëmgesat gëtt.

AUDIO: Background am Gespréich mam François Biltgen

De fréieren CSV-Minister François Biltgen wëll d’Politik hei am Land net kommentéieren. „Ech hunn oppen Aen, oppen Oueren an de Mond, deen zou ass“, sou de François Biltgen e Samschdeg an onser Emissioun Background. Deen, deen zanter 2013 Riichter um EU Geriichtshaff ass, huet erkläert, hie géing sech wéinst sengem Poste ganz „aus dem politesche Geschehen“ eraushalen. „Ech hu meng Memberskaart net zeréckgeschéckt“, sou awer nach de François Biltgen.

AUDIO: François Biltgen iwwert déi national Politik

Ugeschwat op d’EU-Walen an d’Méiglechkeet, datt Rietsparteien un Terrain gewannen, huet den europäesche Riichter sech och neutral ausgedréckt: „D’Wal vum EU-Parlament ass eng Wal vum europäesche Bierger“. Wichteg wier awer, datt d’Bierger „wëssen, wat se maachen“ an dowéinst wier „Opklärung“ wichteg, notamment wat d’Europaparlament eigentlech ass.

Zu de wichtegsten Uerteeler vum EU-Geriichtshaff an de leschte Joren huet de fréiere Politiker d’Affär ëm d’Recht oder net Recht vun engem Patron, enger Employée ze verbidden, e Kappduch op der Aarbecht ze droen. Den EU-Geriichtshaff hat decidéiert, datt een dat net ka verbidden.

AUDIO: François Biltgen iwwert d'Reliounen

Relioun wieren ëmmer „quokeleg“ Saachen, sou de François Biltgen.

Mam François Biltgen, deen zanter 2013 um Kierchbierg mat 27 anere Riichter dat europäescht Recht verdeedegt, hu mir iwwert d’Defie vun der Cour geschwat. An do och op d’Kritiken, déi vu muncher Säit kommen. Ma wat geschitt, wann ee Land sech wiert, eng Decisioun vun der Cour ëmzesetzen. An deem Moment kann d'Kommissioun géint dat Land e Verfahren aleeden, an noutfalls misst dat Land esouguer Strofe bezuelen, bis deen Dag, wou d'Europarecht respektéiert ass.

AUDIO: François Biltgen iwwert d'Kritiken

Nieft der Cour besteet den europäesche Geriichtshaff och aus dem Tribunal. Zwou verschidde Juridictiounen also.  D’Cour gouf 1952 gegrënnt. D’Tribunal dogéint eréischt virun 30 Joer geschaf. Den Tribunal beschäftegt sech mam direkte Verfahren, dat e Bierger, e Betrib oder e Memberstaat huet, par Rapport vun enger Decisioun vun iergendengem europäesche Organ, esou vill wirtschaftlech Froen oder d'Staatshëllefen.

AUDIO: François Biltgen iwwert den Tribunal

Weider war och Thema, wéi nei Riichter fir d'Cour gewielt ginn. D’Riichter um europäesche Geriichtshaff gi vun de Regierungen ernannt. Duerno gëtt d’Prozedur lancéiert, fir sécherzestellen, ob de Riichter europäesche Onparteiesche ka ginn. Dat entscheet ee Comité aus 7 Riichter, déi do d’Qualitéite vun de Kandidaten analyséieren.

AUDIO: François Biltgen iwwert nei Riichter

Op de Brexit ugeschwat, sot de François Biltgen, datt Groussbritannien nach zu all Moment kann decidéieren, fir net aus der EU erauszegoen. Dat haten d'Riichter vum europäesche Geriichtshaff den 10. Dezember 2018 festgehalen.

AUDIO: François Biltgen iwwert de Brexit

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.