D'Lydie Polfer, d'Buergermeeschtesch vun der Stad Lëtzebuerg, war e Samschdeg eis Invitée an der RTL-Emissioun "Background am Gespréich".

"Jiddereen ass betraff vum Doud vum Grand-Duc Jean an et gëtt ee sech erëm méi bewosst iwwert d’Geschicht vun eisem Land" – dat sot d’Stater Buergermeeschtesch Lydie Polfer an der Emissioun Background am Gespréich. Et wier wichteg, datt ee sech un d’Geschicht géing erënneren, well een, deen déi net kennt, d’Gefor géing lafen, déi nämmlecht Feeler ze maachen. Fir d’Begriefnis nächste Samschdeg huet d’Lydie Polfer annoncéiert, datt d’Zeremonie aus der Kathedral wäert op der Place d’Armes iwwerdroe ginn.

D’Stad Lëtzebuerg sicht 30 Leit fir hir Administratiounen. „Mä mir fanne keng Leit méi“, sou d’Stater Buergermeeschtesch Lydie Polfer um Samschdeg de Mëtteg an onser Emissioun „Background“.

D’liberal Politikerin huet erkläert, wéi d’Stad, mä och d’Ministèren un hir Limitte géing stoussen.

Et kéint net méi a méi séier geschafft ginn well et u Leit géing feelen.

D’Stater Buergermeeschtesch huet des weidere gewarnt: wat d’Chantieren ugeet, wäert d’nächst Joer bis Enn 2020, dat schlëmmst ginn.

Vun all de Chantieren, déi am Gaang wieren, wier keen dobäi, deen net absolut noutwendeg wier, sou d’Lydie Polfer. Dobäi kéimen awer och privat Chantieren, déi een awer net kéint refuséieren.

Anere Sujet de Mëtteg war dann de Logement, wou déi liberal Politikerin betount huet, datt d'Gesetzgebung, déi virgesäit, datt bei grousse Projeten, 10% musse reservéiert ginn, fir erschwéngleche Wunnraum, iwwerschafft misst ginn. D'Konditiounen, wéini d'Leit, déi Hëllefen, déi virgesi sinn, kréien, misste kloer iwwerduecht ginn, sou d'Stater Buergermeeschtesch.

AUDIO: Background am Gespréich mam Lydie Polfer
VIDEO: D'Lydie Polfer am Background am Gespréich
D'Stater Buergermeeschtesch am Interview beim Monique Kater. De Resumé vum Claudia Kollwelter.

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.