D'Dany Schumacher, den Dhiraj Sabharwal, de Romain Hilgert an de Claude Karger waren e Samschdeg d'Invitéen an der Emissioun Background am Gespréich.

Een Dag virun den Europawale souze 4 Journaliste bei eis an der Ronn fir e Presseclub Spezial. D'Leit géinge sech net all ze vill fir déi Europawalen interesséieren, huet zum Beispill d'Dany Schumacher aus dem Wort gemengt. Et géing vill iwwer Populiste geschwat ginn a wéineg iwwer Inhalter.

D'Leit wiere realistesch a géinge sech keng Illusioune maachen, esou de Romain Hilgert vum Land. E breede Public wéisst net, wat genee déi 6 Lëtzebuerger Deputéiert zu Stroossbuerg maachen, se wéissten awer, datt dës do net de gréissten Afloss hätten.

An Europa hätte souwisou just d'Nationalstaaten eppes ze soen, seet den Dhiraj Sabharwal vum Tageblatt. E Sonndeg wéissten d'Leit also net, wat mat hirem Vott dono konkret op si duerkënnt.

Allgemeng géingen déi klassesch Zuchpäerd dës Kéier op de Lëschten e bësse feelen, zum Beispill d'CSV, déi mat éischter onbekannte Gesiichter an déi Wahle geet.

De Claude Karger vum Journal schwätzt vun enger Verjéngung bei der CSV. Et wier ageplangt, datt et bei dëse Wale fir d'CSV eventuell Verloschter géing ginn, dat géing dozou gehéieren.

Och en Thema war d'Pirate-Partei.

Pirate wiere laang als eng Momentopnam traitéiert ginn. Laang war et eng 1-Mann-Partei. Bei de leschte Chamber-Walen hätt ee sech dofir kaum 2 Piraten an der Chamber kënne virstellen. Et wier och geféierlech, wann een op dem Pirate-Kandidat Daniel Frères seng Campagne kuckt, déi mat Privatgelder gefuerdert wier, esou Dani Schumacher vum Lëtzebuerger Wort. Et misst een un d'Walgesetz erugoen. D'Parteie-Finanzéierungsgesetz misst méi kloer ginn, Partei-Spende wieren net gereegelt.

Weide géif een ëmmer méi eng rietspopulistesch Spuer bei de Piraten erkennen. Bei der ADR géif een sech op d'manst un Traitéen halen, esou den Dhiraj Sabharwal. D'Pirate wieren ze topeg, fir et richteg ze maachen.

AUDIO: Background Spezial Europawalen

"Background am Gespréich" leeft ëmmer samschdes an der Mëttesstonn (vun 12 bis 13 Auer) op RTL Radio Lëtzebuerg an am Livestream um Internet respektiv an der App (Audio a Video). Dono ass d'Emissioun op RTL.LU zu all Ament nach eemol ze lauschteren oder ze kucken - an der Rubrik "Radio" bei Emissiounen "Background" wielen.